EV కొన్నవారికి రోడ్ టాక్స్ రద్దు: సీఎం రేవంత్ రెడ్డి

తెలంగాణలో ఎలక్ట్రిక్ వాహనాలు కొనుగోలు చేసేవారికి రోడ్ టాక్స్ మరియు రిజిస్ట్రేషన్ రుసుములు వసూలు చేయబోమని ముఖ్యమంత్రి రేవంత్ రెడ్డి ప్రకటించారు.

ఈ నిర్ణయం వల్ల రాష్ట్ర ప్రభుత్వానికి సంవత్సరానికి సుమారు రూ.1,500 కోట్ల ఆదాయం నష్టం వాటిల్లుతుందని ఆయన తెలిపారు. ఢిల్లీ, ముంబై, బెంగళూరు వంటి నగరాల్లో కాలుష్యం, వరదలు, ట్రాఫిక్ సమస్యలను ప్రస్తావించిన సీఎం, హైదరాబాద్‌ను అంతర్జాతీయ నాణ్యత గల నగరంగా తీర్చిదిద్దేందుకు ప్రభుత్వం కట్టుబడి ఉందన్నారు.

ఈ క్రమంలో హైదరాబాద్ చుట్టూ 2,073 చదరపు కిలోమీటర్ల 'క్యూర్' (Core Urban Region Economy) ప్రాంతాన్ని సర్వీస్ సెక్టార్‌గా, ఔటర్ రింగ్ రోడ్ వెలుపల 10,000 చదరపు కిలోమీటర్లను ఉత్పాదక జోన్‌గా, రీజనల్ రింగ్ రోడ్ బయటి ప్రాంతాన్ని వ్యవసాయ ఆర్థిక ప్రాంతంగా విభజించామని వివరించారు.

పారిశ్రామికాభివృద్ధికి అవసరమైన విద్యుత్, నీరు, భూమి, అనుమతులు, నైపుణ్యం కలిగిన యువతను అందుబాటులోకి తీసుకువస్తామని, దీని ద్వారా చైనాతో పోటీపడే స్థాయిలో తెలంగాణను తీర్చిదిద్దుతామని ఆయన అన్నారు. ఈ మూడు జోన్‌ల కాంబినేషన్‌ను 'తెలంగాణ రైజింగ్ 2047' విజన్‌లో భాగంగా అభివృద్ధి చేయనున్నట్లు తెలిపారు.