పంచాయతీరాజ్ సమీక్ష: పింఛన్లు, గ్రామ రోడ్లు, కార్యాలయ భవనాలపై సీఎం రేవంత్ ఆదేశాలు

తెలంగాణ ముఖ్యమంత్రి రేవంత్ రెడ్డి పంచాయతీ రాజ్ శాఖపై సమీక్షా సమావేశం నిర్వహించారు. పింఛన్లు, గ్రామాల్లో మౌలిక వసతులు, పారిశుద్ధ్యం తదితర అంశాలపై ఆయన పలు ఆదేశాలు జారీ చేశారు.

పెన్షన్ల విషయంలో, తలసేమియా, సికిల్‌సెల్ వ్యాధిగ్రస్తులకు పింఛన్లు మంజూరు చేయాలని సూచించారు. ఈ పింఛన్లు ఆగస్టు 15 నుంచి అమలులోకి రానున్నాయి. వితంతువులు, ఒంటరి మహిళలు, నేత కార్మికులకు కూడా పింఛన్లు అందించనున్నట్లు తెలిపారు. ఒక దివ్యాంగుడు మరణిస్తే ఆయన భార్యకు వెంటనే పింఛన్ ఇచ్చే ఏర్పాటు చేయాలన్నారు. పింఛన్ల పంపిణీలో ఎలాంటి జాప్యం జరగకూడదని సీఎం హెచ్చరించారు.

గ్రామీణ మౌలిక వసతులపై సీఎం పలు ఆదేశాలు ఇచ్చారు. ప్రతి గ్రామానికి తారు రోడ్డు నిర్మించాలని, ప్రతి పంచాయతీకి కార్యాలయ భవనం ఉండాలని స్పష్టం చేశారు. పంచాయతీలకు వెంటనే నిధులు విడుదల చేయాలని, పారిశుధ్య పనులకు ఆటంకాలు ఉండకూడదని తెలిపారు. అభివృద్ధి పనుల పర్యవేక్షణ బాధ్యత ఎంపీడీఓలదేనని చెప్పారు.

ఇందిరమ్మ చీరల నాణ్యతపై రాజీపడకుండా, బలంగా ఉండే డిజైన్లతో తయారు చేయించాలని సూచించారు. ప్రతి 45 రోజులకు ఒకసారి మండల పరిషత్ సమావేశాలు నిర్వహించాలని, ఎల్‌నినో పరిస్థితులపై అప్రమత్తంగా ఉండి తాగునీటికి తొలి ప్రాధాన్యత ఇవ్వాలని సమావేశంలో సూచించారు.