దేవాలయాల హుండీలు, ఆదాయ వివరాలపై RTI దరఖాస్తు చేయవచ్చా?

దేవాలయాల ఆదాయం, హుండీ లెక్కలు, కార్యకలాపాలపై RTI ద్వారా సమాచారం కోరవచ్చని న్యాయవాది కోటిపల్లి అయ్యప్ప తెలిపారు. అయితే RTI చట్టం అన్ని దేవాలయాలకు వర్తించదని ఆయన స్పష్టం చేశారు.

ప్రభుత్వ నిధులతో నడిచే దేవాలయాలు, ప్రభుత్వ అధీనంలో ఉన్న దేవాలయాలు RTI పరిధిలోకి వస్తాయి. అర్చకుల సేవలు, మంత్రోచ్ఛారణ, ఆగమశాస్త్ర విషయాలు మినహా మిగిలిన రికార్డులు అడగవచ్చని ఆయన వివరించారు. పూర్తిగా ప్రైవేట్ దేవాలయాల వివరాలు RTI కింద పొందలేమని తెలిపారు.

దేవాలయ ఆస్తులు, స్థిరాస్తుల రికార్డులు కూడా RTI ద్వారా కోరవచ్చు. దేవాలయ కమిషనర్లు, అసిస్టెంట్ కమిషనర్ల నియామకం, ప్రమోషన్ వివరాలను సైతం అడిగే అవకాశం ఉందని ఆయన చెప్పారు.

కోఆపరేటివ్ సొసైటీల విషయంలో 2013 సుప్రీంకోర్టు తీర్పులోని పారా 30, 39, 40, 41 ప్రకారం కేంద్రం, రాష్ట్ర ప్రభుత్వ నిధులు లేదా నియంత్రణ ఉంటే వాటిని పబ్లిక్ అథారిటీగా పరిగణించవచ్చని ఆయన తెలిపారు. దీంతో ప్రభుత్వ సబ్సిడీలు పొందే ఆంధ్రప్రదేశ్ కోఆపరేటివ్ సొసైటీలు RTI పరిధిలోకి వస్తాయని చెప్పారు.

RTI దరఖాస్తుకు సాధారణంగా 30 రోజుల్లో సమాచారం ఇవ్వాలి. అత్యవసర పరిస్థితుల్లో 48 గంటల్లో సమాచారం ఇవ్వాల్సి ఉంటుందని ఆయన తెలిపారు. సమాధానం రాకపోతే ప్రథమ అప్పీల్, తర్వాత ద్వితీయ అప్పీల్ చేయవచ్చు. ఆ తర్వాత సమాచార కమిషనర్‌కు ఫిర్యాదు చేయవచ్చన్నారు.

సమాచారం ఇవ్వని అధికారులపై రోజుకు ₹250 చొప్పున జరిమానా విధించే అవకాశం ఉందని న్యాయవాది తెలిపారు. ఈ వివరణ ఒక న్యాయపరమైన అవగాహన కార్యక్రమంలో ఇచ్చారు.