కోమటికుంట చెరువు నిర్వహణపై సబితా ఇంద్రారెడ్డి విమర్శ

బీఆర్ఎస్ ఎమ్మెల్యే, మాజీ మంత్రి సబితా ఇంద్రారెడ్డి రంగారెడ్డి జిల్లా బడంపేట్ సర్కిల్‌లోని అల్మాస్‌గూడా కోమటికుంట చెరువును సందర్శించారు. చెరువు నిర్వహణపై ప్రభుత్వం శ్రద్ధ చూపడం లేదని ఆమె అన్నారు.

ఈ సందర్భంగా వినాయక హిల్స్ కాలనీలో ₹1.18 కోట్లతో చేపట్టనున్న అభివృద్ధి పనులను ఆమె ప్రారంభించారు. అనంతరం చెరువును పరిశీలించిన సబితా.. గుర్రపుడెక్క, దోమల పెరుగుదల, దుర్వాసనతో స్థానికులు ఇబ్బందులు పడుతున్నారని తెలిపారు.

చెరువు సుందరీకరణతో పాటు నిరంతర నిర్వహణ చేపట్టాలని ప్రభుత్వాన్ని కోరారు. కాలనీలో డ్రైనేజీ సమస్య పరిష్కారానికి జీహెచ్ఎంసీ కమిషనర్ ఇటీవల రూ.2 కోట్ల రెండు పనులకు అనుమతి ఇచ్చారని, దీంతో వర్షం వచ్చినా ఇబ్బంది ఉండదని ఆమె వివరించారు.

తమ ప్రభుత్వ హయాంలోనే ఈ ప్రాంతంలో డ్రైనేజీ వ్యవస్థ, రక్షిత మంచినీటి సరఫరా, రోడ్ల అభివృద్ధి, రిజర్వాయర్ నిర్మాణం జరిగాయని ఆమె చెప్పారు. చెరువు నిర్వహణపై ప్రభుత్వం నుంచి స్పందన రావాల్సి ఉంది.