సాయికృష్ణ కేసు: నాగరాజును కస్టడీ విచారణకు హైకోర్టు అనుమతి

సాయికృష్ణ కస్టోడియల్ డెత్ కేసులో సీఐ నాగరాజును సిట్ అధికారులు కస్టడీలోకి తీసుకున్నారు. ఎనిమిది రోజుల పాటు నాగరాజును విచారించడానికి ఏపీ హైకోర్టు అనుమతి ఇచ్చింది.

దిగువ కోర్టు రాజమహేంద్రవరం జైల్లో విచారణకు ఆదేశించగా, సిట్ హైకోర్టును ఆశ్రయించింది. తాజాగా నిందితుడిని విజయవాడకు తీసుకువచ్చి ఎవిడెన్స్ సేకరించేందుకు కోర్టు అనుమతించింది. సీన్ రీకన్స్ట్రక్షన్ ద్వారా కేసు దర్యాప్తు ముందుకు సాగనుంది.

సాయికృష్ణ మృతదేహం ఏమైంది, ఎలా చనిపోయాడనేది ఇంకా తేలలేదు. నాగరాజు నోరు విప్పితే వాస్తవాలు బయటకు వచ్చే అవకాశం ఉందని అధికారులు భావిస్తున్నారు. నాగరాజు విచారణలో సహాయ నిరాకరణ చేస్తే దర్యాప్తు ముందుకు సాగడం కష్టమని తెలుస్తోంది.

ఇదిలావుండగా, కృష్ణలంక స్టేషన్ సిబ్బందిని సిట్ అధికారులు ప్రశ్నిస్తున్నారు. మంగళవారం హెడ్ కానిస్టేబుల్ చెన్నయ్య, సత్యనారాయణ, కానిస్టేబుల్ బాబు, అసిస్టెంట్ రైటర్ వీరాంజనేయుడు, రైటర్ రాజేష్ తదితరులు విచారణకు హాజరయ్యారు. నాగరాజు విచారణ నేటి నుంచి 16వ తేదీ వరకు కొనసాగనుంది.

మరోవైపు, నాగరాజు రిమాండును ఈ నెల 22 వరకు పొడిగిస్తూ కోర్టు ఆదేశాలు ఇచ్చింది. ఈ కేసులో ఇప్పటివరకు ఐదుగురు అరెస్టయ్యారు. సాయికృష్ణ మృతదేహం ఆచూకీపై కీలక సమాచారం కోసం దర్యాప్తు కొనసాగుతోంది.