సైదాబాద్ స్టీల్ బ్రిడ్జ్ మరో నెలలో ప్రారంభం; పాతబస్తీ ట్రాఫిక్‌కు ఉపశమనం

హైదరాబాద్‌లో సైదాబాద్ స్టీల్ బ్రిడ్జ్ నిర్మాణం చివరి దశకు చేరుకుంది. మరో నెల రోజుల్లో ఈ బ్రిడ్జ్ ప్రజలకు అందుబాటులోకి వస్తుందని జీహెచ్ఎంసీ అధికారులు తెలిపారు.

చంచల్గూడా ప్రింటింగ్ ప్రెస్ నుంచి సంతోష్ నగర్ యాదగిరి థియేటర్ వరకు 3.32 కిలోమీటర్ల మేర ఈ బ్రిడ్జ్ నిర్మించారు. 650 కోట్ల రూపాయల వ్యయంతో ఎస్ఆర్డీపీ కింద ఈ ప్రాజెక్టు చేపట్టారు. ఇందులో 85 భారీ పిల్లర్లు, 15,000 మెట్రిక్ టన్నుల స్టీల్ ఉపయోగించారు.

ప్రస్తుతం బ్రిడ్జ్ పై బీటీ రోడ్డు పూర్తయ్యింది. రాంపులు, సైడ్ వాల్స్, లైటింగ్ వంటి ఫినిషింగ్ పనులు జరుగుతున్నాయి. 2020లో మొదలైన ఈ ప్రాజెక్టు భూసేకరణ, కరోనా, కార్మికుల కొరత, స్టీల్ ధరల పెరుగుదల వంటి ఆటంకాలతో ఆలస్యమైంది.

ఈ బ్రిడ్జ్ వల్ల సైదాబాద్, సంతోష్ నగర్, మలక్పేట్, చంచల్గూడ ప్రాంతాల్లో ట్రాఫిక్ ఒత్తిడి తగ్గుతుందని అధికారులు చెప్పారు. ప్రస్తుతం 30 నిమిషాలు పట్టే ప్రయాణం 10 నిమిషాలకే తగ్గుతుంది. నిర్మాణ సమయంలో దుమ్ము, రోడ్ల మూసివేతలతో స్థానికులు ఇబ్బందులు పడ్డారు. అయినా బ్రిడ్జ్ ప్రారంభంతో శాశ్వత పరిష్కారం లభిస్తుందని ఆశిస్తున్నారు.

త్వరలో వచ్చే బోనాల పండుగ సమయంలో ఈ బ్రిడ్జ్ రద్దీ నిర్వహణకు ఉపయోగపడుతుంది. కొంతమంది స్థానికులు కనెక్టింగ్ రోడ్ల వెడల్పు కూడా అవసరమని అభిప్రాయపడ్డారు.