సంగారెడ్డి రైతు అబ్దుల్ వాజీద్: ఒకే పొలంలో నువ్వులు, కంది సాగుతో రెట్టింపు ఆదాయం

సంగారెడ్డి జిల్లా కోహీరు మండలం పిచారగడి గ్రామానికి చెందిన రైతు అబ్దుల్ వాజీద్ ఒకే పొలంలో రెండు పంటలు సాగు చేస్తూ ఆదాయాన్ని పెంచుకుంటున్నారు. ఈ ఖరీఫ్ సీజన్‌లో ఆయన రెండు ఎకరాల్లో తెల్ల నువ్వులతో పాటు కందిని అంతరపంటగా సాగు చేశారు.

నేల సారాన్ని కాపాడేందుకు, చీడపీడలను తగ్గించేందుకు పంట మార్పిడి పద్ధతిని అనుసరిస్తున్నారు. తెల్ల నువ్వు 90 రోజుల పంట కాగా, ప్రస్తుతం పూత దశలో ఉంది. మరో నెలలో కోతకు సిద్ధమవుతుంది. తక్కువ పెట్టుబడితో సాగు చేయగల ఈ పంటకు మార్కెట్లో డిమాండ్, గిట్టుబాటు ధర ఉండటంతో ఆశాజనక ఆదాయం వస్తుందని రైతు అంచనా.

అబ్దుల్ వాజీద్ మాట్లాడుతూ, నువ్వుల పంటకు ఎకరానికి రూ.20,000–25,000 వరకు ఖర్చవుతుందని, రెండు మూడు సార్లు కలుపు తీస్తే సరిపోతుందని వివరించారు. నువ్వులు నరాలకు, ఆరోగ్యానికి మంచిదని వైద్యులు సిఫారసు చేస్తున్నారని, అందుకే ఈ పంట ఎంచుకున్నామని తెలిపారు. నువ్వులకు క్వింటాల్‌కు రూ.10,000–12,000 ధర లభిస్తోందన్నారు.

ఒకే భూమిలో రెండు పంటలు సాగు చేయడం వల్ల సాగు వ్యయం తగ్గి లాభాలు పెరుగుతాయని రైతు చెప్పారు. గత సీజన్‌లో ఇదే పొలంలో అల్లం, అరటి సాగు చేసిన అనుభవం తనకు ఉందన్నారు. ఈ తరహా పంట మార్పిడి, అంతరపంటల పద్ధతి ఇతర రైతులకు ఉపయుక్తంగా ఉండవచ్చని వ్యవసాయ వర్గాలు అంటున్నాయి.