సంగారెడ్డిలో గొలుసు లాక్కెళ్లే యత్నం.. దొంగలను పట్టుకున్న రైతులు

సంగారెడ్డి జిల్లాలో పొలంలో పని చేస్తున్న ఓ మహిళ మెడలోని బంగారు పుస్తెల తాడును లాక్కెళ్లేందుకు ఇద్దరు వ్యక్తులు యత్నించారు. గమనించిన స్థానిక రైతులు వారిని పట్టుకుని పోలీసులకు అప్పగించారు.

హత్నూర, జిన్నారం మండలాల సరిహద్దులో ఈ ఘటన జరిగింది. సోలక్‌పల్లి గ్రామానికి చెందిన ఆ మహిళ పొలంలో ఒంటరిగా పని చేస్తోంది. ఆమె ఒంటరిగా ఉన్నట్టు గమనించిన ఇద్దరు దారి అడుగుతున్నట్టు నటించారు. తర్వాత ఆమెపై దాడి చేసి మూడు తులాల బంగారు పుస్తెల తాడును లాక్కున్నారు. బైక్‌పై పరారయ్యేందుకు యత్నించారు.

ఆమె కేకలు వేయడంతో రైతులు వారిని వెంబడించి పట్టుకున్నారు. వారిని కొట్టి, గొలుసును తిరిగి తీసుకుని ఆ మహిళకు అప్పగించారు. అనంతరం పోలీసులకు సమాచారం ఇచ్చారు.

పోలీసులు ఘటనా స్థలానికి చేరుకుని ఇద్దరు నిందితులను అదుపులోకి తీసుకున్నారు. వారిలో ఒకరిని మీనంపల్లి అరవింద్‌గా గుర్తించారు. వీరిపై ఇప్పటికే నాలుగుకు పైగా కేసులు ఉన్నట్టు పోలీసులు తెలిపారు. కేసు నమోదు చేసుకుని దర్యాప్తు చేపట్టారు.