కొమరంభీం జిల్లాలో సప్తగుండాల జలపాతానికి పర్యాటకుల పోటు, రోడ్డు సదుపాయం కోసం ప్రభుత్వానికి విజ్ఞప్తి

కొమరంభీం జిల్లా లింగాపూర్ మండలం పిట్టగూడ సమీపంలోని దట్టమైన అడవిలో ఏడు జలపాతాలు ఉన్నాయి. వీటిని స్థానిక గిరిజనులు 'సప్తగుండాలు' అని పిలుస్తారు. ఈ నేపధ్యంలో 'మిట్టె జలపాతం'గా ప్రసిద్ధి చెందిన ఈ ప్రదేశానికి ఇటీవల పర్యాటకులు భారీగా వస్తున్నారు.

హైదరాబాద్ సహా పలు ప్రాంతాల నుంచి వచ్చే సందర్శకులు జలపాతాల్లో స్నానాలు చేయడం, సెల్ఫీలు దిగడం, ట్రెక్కింగ్ చేయడం వంటి కార్యకలాపాలతో ఆనందిస్తున్నారు. వీటికి సమీపంలోనే 100 మీటర్ల ఎత్తు నుంచి జాలువారే 'బాహుబలి జలపాతం' కూడా ఆకట్టుకుంటోంది. ఏటు చూసినా తీగజాతి మొక్కలతో పెనవేసుకున్న అడవి దృశ్యం ట్రెకింగ్ చేసేవారికి సాహస యాత్రలా మారింది.

అయితే జలపాతాలను చేరుకోవడానికి సరైన రహదారి సౌకర్యం లేదు. సందర్శకులు దాదాపు 2 కిలోమీటర్లు కాలినడకన వెళ్లాల్సి వస్తోంది. ఈ నేపధ్యంలో రోడ్డు మార్గం, ప్రాథమిక వసతులు కల్పించాలని పర్యాటకులు ప్రభుత్వాన్ని కోరుతున్నారు. స్థానికులు కూడా ఈ ప్రాంతాన్ని అభివృద్ధి ప్రాజెక్టులో చేర్చితే ఎక్కువ మంది రావడానికి అవకాశం ఉంటుందని అభిప్రాయపడుతున్నారు.