కరీంనగర్ శాతవాహన యూనివర్సిటీలో అనుమతి లేకుండా చెట్ల నరికివేత.. అటవీ శాఖ విచారణ

కరీంనగర్ శాతవాహన యూనివర్సిటీ క్యాంపస్‌లో వందలాది చెట్లు నరికివేసిన ఘటనపై అటవీ శాఖ విచారణ జరిపింది. అటవీ శాఖ అనుమతి లేకుండానే చెట్లు నరికినట్టు జిల్లా అటవీ అధికారి (DFO) సత్యనారాయణ నిర్ధారించారు.

విద్యార్థి సంఘాల ఫిర్యాదు మేరకు, కలెక్టర్ ఆదేశాలతో DFO సత్యనారాయణ క్యాంపస్‌ను సందర్శించి క్షేత్రస్థాయి విచారణ చేపట్టారు. గ్యాలరీ, లా కాలేజ్, సింథటిక్ ట్రాక్ అభివృద్ధి పనుల పేరుతో పెద్ద ఎత్తున చెట్లు నరికివేత, మట్టి తవ్వకాలు జరిగాయి. ఈ పనులకు ₹10 కోట్లు మంజూరయ్యాయని విద్యార్థి నేతలు చెప్తున్నారు.

దాదాపు 200 నుంచి 400 వరకు పెద్ద చెట్లను నరికేశారని విద్యార్థి సంఘాలు ఆరోపిస్తున్నాయి. మరో 500 చెట్లను JCB సాయంతో వేళ్లతో సహా పెకిలించారని అవి చెప్తున్నాయి. ఈ అంశంపై వీడియో ఆధారాలను యూనివర్సిటీ JAC బయటపెట్టింది. క్యాంపస్‌లో స్వేచ్ఛగా తిరిగే నెమళ్లు, కుందేళ్లు, అరుదైన పక్షుల ఆవాసాలు దెబ్బతిన్నాయని విద్యార్థి నేతలు చెప్తున్నాయి. అటవీ శాఖ అనుమతి తీసుకోకుండానే పనులు చేపట్టారని వారు ఆరోపిస్తున్నారు.

అయితే ఈ ఆరోపణలను యూనివర్సిటీ రిజిస్ట్రార్ ప్రొఫెసర్ సతీష్ కుమార్ కొట్టిపారేశారు. సింథటిక్ ట్రాక్ ఎత్తు పెంచాల్సి వచ్చిందని ఆయన తెలిపారు. ఫుట్‌బాల్ గ్రౌండ్ కోసం సమీపంలోని కొండ ప్రాంతం నుంచి మట్టి తీసి వాడుకున్నామని చెప్పారు. ఇందులో కాంట్రాక్టర్‌కు ఎలాంటి ఫేవర్ గానీ అవినీతి గానీ జరగలేదని ఆయన అన్నారు. టెండర్ సమయంలోనే ఎన్ని క్యూబిక్ మీటర్ల మట్టి అవసరమో నిర్ణయిస్తారని, కొలతలు సరిపోతాయని వివరించారు.

నరికిన చెట్ల సంఖ్యను లెక్కించి, వన్యప్రాణి, అటవీ చట్టాల ప్రకారం యూనివర్సిటీ అధికారులకు నోటీసులు జారీ చేసి భారీ జరిమానా విధిస్తామని DFO స్పష్టం చేశారు.

అటవీ శాఖ విచారణ నివేదిక ఆధారంగా బాధ్యులపై కఠిన చర్యలు తీసుకోవాలని విద్యార్థి సంఘాలు డిమాండ్ చేస్తున్నాయి. చిన్న స్థాయి ఉద్యోగులపై కాకుండా యూనివర్సిటీ రిజిస్ట్రార్ స్థాయి అధికారులపై కేసు నమోదు చేయాలని కోరుతున్నాయి. బాధ్యులను సస్పెండ్ చేయాలని, నరికిన చెట్లకు రెట్టింపు సంఖ్యలో మొక్కలు నాటాలని డిమాండ్ చేస్తున్నాయి. అభివృద్ధి పనులను వ్యతిరేకించడం లేదని, కానీ నిబంధనలను ఉల్లంఘించడం సమంజసం కాదని విద్యార్థులు చెప్తున్నారు.