శబరిమల భక్తులకు రూ.2 లక్షల ఉచిత జీవిత బీమా: ట్రావెన్‌కోర్ దేవస్వం బోర్డు నిర్ణయం

శబరిమల అయ్యప్పస్వామి దర్శనానికి వచ్చే భక్తులకు రూ.2 లక్షల ఉచిత జీవిత బీమా ఇవ్వాలని ట్రావెన్‌కోర్ దేవస్వం బోర్డు నిర్ణయించింది. LIC భాగస్వామ్యంతో ఈ పథకం అమలు చేయనున్నట్టు బోర్డు అధ్యక్షుడు కే జయకుమార్ తెలిపారు.

ఈ పథకం కింద పూర్తి ప్రీమియం మొత్తాన్ని దేవస్వం బోర్డే భరిస్తుంది. ఇప్పటివరకు ప్రమాద బీమా మాత్రమే అందుబాటులో ఉండగా, ఇప్పుడు ఏ కారణంతో మరణించినా జీవిత బీమా వర్తించేలా మార్పు చేశారు. శబరిమల యాత్ర చరిత్రలో ఇలాంటి జీవిత బీమా ఇవ్వడం ఇదే తొలిసారి అని బోర్డు తెలిపింది.

వర్చువల్ క్యూ స్లాట్ బుకింగ్ ద్వారా దర్శనానికి వచ్చే భక్తులందరికీ ఈ బీమా వర్తిస్తుంది. కొండ ఎక్కడానికి ఒక రోజు ముందు నుంచి మూడు రోజుల పాటు బీమా కాలపరిమితి అమల్లో ఉంటుంది. దర్శనం ముగించుకుని స్వస్థలం చేరిన తర్వాత నిర్దేశిత గడువులోపు మరణిస్తే కుటుంబ సభ్యులు బీమా క్లెయిమ్ చేసుకోవచ్చు.

స్లాట్ బుక్ చేసుకునే సమయంలోనే భక్తులు తమ నామినీ పేరు, బంధుత్వం వివరాలు తప్పనిసరిగా నమోదు చేయాల్సి ఉంటుంది. రిజిస్ట్రేషన్ లేకుండా వచ్చి ఎవరైనా మరణిస్తే, వారు నిజమైన శబరిమల యాత్రికులే అని బోర్డు అధికారులు ధృవీకరిస్తే బీమా సహాయం అందిస్తామని బోర్డు తెలిపింది.