పెందుర్తిలో రోడ్డు మధ్యలో వైన్ షాప్.. తొలగించాలని జనసేన ఎమ్మెల్యే నిరసన

విశాఖపట్నం జిల్లా పెందుర్తి నియోజకవర్గం సుజాత నగర్‌లో 80 అడుగుల రహదారి మధ్యలో వైన్ షాపు ఏర్పాటు చేశారు. దీన్ని తక్షణమే తొలగించాలని కోరుతూ జనసేన ఎమ్మెల్యే పంచకళ్ళ రమేష్ బాబు నిరసనకు దిగారు.

ఈ నిరసనలో కాలనీవాసులు, మహిళలు పెద్ద ఎత్తున పాల్గొన్నారు. జనసేన నాయకులు, వామపక్ష పార్టీల నాయకులు, కార్యకర్తలు కూడా హాజరయ్యారు.

ఈ వైన్ షాపు సమీపంలో 500 మీటర్ల దూరంలో లక్ష్మీ నరసింహ స్వామి దేవాలయం ఉందని ఎమ్మెల్యే తెలిపారు. పిల్లలు బస్సు ఎక్కే బస్ స్టాండ్ కూడా ఇక్కడే ఉందని, దీనివల్ల మహిళలు, విద్యార్థులు ఇబ్బంది పడుతున్నారని చెప్పారు.

దేవాలయం, పాఠశాలలకు దగ్గరలో వైన్ షాపు ఉందని నెల రోజుల క్రితమే ఎక్సైజ్ శాఖ అధికారులకు ఫిర్యాదు చేశామని ఆయన ఆరోపించారు. అయినా అధికారులు స్పందించలేదని, షాపు తెరవడానికి అనుమతించారని ఆరోపించారు.

ఒక వారంలోగా వైన్ షాపును తొలగించకపోతే మళ్లీ నిరసన చేపడతామని హెచ్చరించారు. తమ ఉద్దేశం ఎవరి వ్యాపారానికీ నష్టం చేయడం కాదని, షాపును వేరే ప్రదేశానికి తరలించాలని మాత్రమే కోరుతున్నామని ఎమ్మెల్యే స్పష్టం చేశారు.

ఈ విషయంపై ఎక్సైజ్ శాఖ అధికారుల స్పందన తెలియాల్సి ఉంది.