తిరుమలలో AI స్మార్ట్ బస్ షెల్టర్లు: తొలి దశలో రెండు ఏర్పాటు

తిరుమలలో భక్తుల సౌకర్యార్థం ఆర్టిఫిషియల్ ఇంటెలిజెన్స్ ఆధారిత స్మార్ట్ బస్ షెల్టర్లను ఏర్పాటు చేయాలని TTD ప్రణాళికలు రూపొందిస్తోంది. తొలి దశలో పైలట్ ప్రాజెక్టుగా రెండు స్మార్ట్ బస్ షెల్టర్లను నిర్మించాలని భావిస్తోంది.

ఈ షెల్టర్లలో డిజిటల్ డిస్ప్లేలు, CC కెమెరాలు, పబ్లిక్ అడ్రెస్ సిస్టమ్ ఉంటాయి. అత్యవసర సమయాల్లో ఉపయోగపడే SOS బటన్, ఆధునిక లైటింగ్, అగ్నిమాపక పరికరాలను కూడా కల్పించనున్నారు. బస్సుల రాకపోకలు, ప్రయాణ మార్గాలు, ఇతర ముఖ్యమైన సమాచారాన్ని భక్తులు డిజిటల్ వ్యవస్థల ద్వారా తెలుసుకోవచ్చు.

తిరుమలలో దాదాపు 46 దర్శనీయ ప్రాంతాలకు రవాణా సౌకర్యాలు ఉన్నాయి. అయితే ప్రస్తుతం 21 బస్ స్టాపులు మాత్రమే అందుబాటులో ఉన్నాయి. ఇప్పుడు ఉన్న 21 స్టాప్లతో పాటు మరో నాలుగు ప్రాంతాల్లో బస్ షెల్టర్లు ఏర్పాటు చేయాలని TTD యోచిస్తోంది.

ఒక్కో స్మార్ట్ బస్ షెల్టర్ నిర్మాణానికి సుమారు ₹22 లక్షల నుంచి ₹30 లక్షల వరకు ఖర్చు అవుతుందని అంచనా వేస్తున్నారు. ఈ ప్రాజెక్టులో రేమాన్స్ సంస్థ ముందుకు వచ్చింది. వారణాసిలో ఏర్పాటు చేసిన ఆధునిక బస్ షెల్టర్లను పరిశీలించిన తర్వాత తిరుమలలోనూ ఇలాంటి సౌకర్యాలు అందుబాటులోకి తేవాలని భావిస్తున్నారు. రెండు సంస్థల సహకారంతో పైలట్ ప్రాజెక్టు చేపట్టనున్నారు.

ప్రస్తుతం తిరుమలలో వివిధ ప్రాంతాలకు ఉచిత బస్సు సౌకర్యం ఉంది. బస్సుల కోసం వేచి ఉండే భక్తులు ఎండ, వాన, చలి వల్ల ఇబ్బంది పడుతున్నారు. ఈ సమస్యకు పరిష్కారంగానే స్మార్ట్ బస్ షెల్టర్లను నిర్మించాలని TTD భావిస్తోంది. ఇవి ప్రధానంగా వృద్ధులు, మహిళలు, చిన్నారులకు ఉపయోగకరంగా ఉంటాయని TTD అంచనా వేస్తోంది.