కొవిడ్ పరిస్థితిపై మంత్రి సత్యకుమార్ వివరణ: పరీక్షలు పెంచాం, భయపడాల్సిన అవసరం లేదు

ఆంధ్రప్రదేశ్‌లో కొవిడ్-19 పరిస్థితిపై రాష్ట్ర వైద్య ఆరోగ్య శాఖ మంత్రి సత్య కుమార్ యాదవ్ వివరణ ఇచ్చారు. గత 20 రోజులుగా కొవిడ్ కేసులను నియంత్రించేందుకు చర్యలు తీసుకుంటున్నట్లు తెలిపారు.

కేసులు నమోదైన వెంటనే కాంటాక్ట్ ట్రేసింగ్ చేయించి, బాధితులను హోమ్ ఐసోలేషన్ లేదా ఐసోలేషన్ వార్డుల్లో ఉంచుతున్నామని చెప్పారు. నిరంతరం పరిస్థితిని పర్యవేక్షిస్తున్నట్లు తెలిపారు.

ఇటీవల కొన్ని మరణాలు సంభవించిన మాట వాస్తవమేనని, అయితే ఆ మరణాలు హెమటాలజికల్ సమస్యలు, రీనల్ ఫెయిల్యూర్, హై బీపీ వంటి కోమార్బిడిటీస్ ఉన్నవారిలో సంభవించినట్లు మంత్రి వివరించారు. జీనోమ్ సీక్వెన్సింగ్ కోసం శాంపిల్స్‌ను పూణే వైరాలజీ ల్యాబ్‌కు పంపించామని, ప్రస్తుతం వ్యాప్తిలో ఉన్న వేరియంట్ ప్రమాదకరమైనది కాదని ప్రాథమిక సమాచారం ఉన్నా ముందుజాగ్రత్తగా పరీక్షలు చేస్తున్నామని తెలిపారు.

ఆర్టీ-పీసీఆర్ పరీక్షల సంఖ్యను పెంచుతున్నామని, పరీక్షలు ఎక్కువగా చేస్తేనే కేసులు బయటపడతాయని మంత్రి చెప్పారు. కేసుల వివరాలను కేంద్ర ప్రభుత్వానికి, ఐసీఎంఆర్‌కు నివేదిస్తున్నట్లు తెలిపారు. ప్రజలు భయాందోళనలు చెందాల్సిన అవసరం లేదని, అప్రమత్తంగా ఉండాలని సూచించారు.