కోనసీమలో గోదావరి డెల్టా నీటి సరఫరా పరిశీలించిన మంత్రి నిమ్మల రామానాయుడు

ఆంధ్రప్రదేశ్ రాష్ట్ర జలవనరుల శాఖ మంత్రి నిమ్మల రామానాయుడు డాక్టర్ బి.ఆర్. అంబేద్కర్ కోనసీమ జిల్లాలో పర్యటించారు. కొత్తపేట, ఆత్రేయపురం మండలాల్లోని ధవళేశ్వరం బ్యారేజీ, లొల్ల-పాలివెల లాకులను ఆయన పరిశీలించారు. మంత్రి సుభాష్, ఎమ్మెల్యే సత్యనందరావుతో కలిసి నీటి పరిస్థితిని సమీక్షించారు.

తర్వాత, పలు నియోజకవర్గాల కాలువ గట్ల వెంట బైక్పై ప్రయాణిస్తూ నీటి ప్రవాహ నిర్వహణ తీరును తనిఖీ చేశారు. ప్రస్తుతం వర్షాభావ పరిస్థితుల నేపథ్యంలో డెల్టా ప్రాంతంలో నీటి నిర్వహణ సవాలుగా మారిందని ఆయన అన్నారు. గోదావరిలో జూలై నెలలో గత 70 ఏళ్లలో అత్యంత తక్కువ ఇన్ఫ్లో నమోదైందని, 15 వేల క్యూసెక్కుల నీరు మాత్రమే వచ్చిందని తెలిపారు.

ఈ అరుదైన పరిస్థితికి ‘సూపర్ ఎల్ నిన్యో’ ప్రభావం, గత ప్రభుత్వ హయాంలో నీటి నిర్వహణ లోపాలు కారణమని మంత్రి వివరించారు. రైతులకు ఇబ్బందులు లేకుండా ఉండేందుకు ప్రస్తుతం సీలేరు రిజర్వాయర్ నుండి 4-5 వేల క్యూసెక్కుల నీటిని డెల్టాకు విడుదల చేస్తున్నామని, నీటి పంపిణీ సమర్ధవంతంగా నిర్వహిస్తున్నామని హామీ ఇచ్చారు.

గోదావరి డెల్టా ఏపీ వ్యవసాయానికి గుండెకాయ లాంటిదని, నీటి కొరతను అధిగమించేందుకు ప్రభుత్వం చర్యలు తీసుకుంటోందని మంత్రి వెల్లడించారు.