విజయనగరం: మర్రివలసలో పాఠశాల శిథిలం, నదికి వంతెన లేదు; కొత్త భవనానికి ఆమోదం

విజయనగరం జిల్లా గజపతినగరం నియోజకవర్గంలోని మర్రివలస గ్రామంలో విద్య, రవాణా సదుపాయాలు తీవ్రంగా దెబ్బతిన్నాయి. పంచాయతీ భవనంలోని ఒకే గదిలో అంగన్వాడీ కేంద్రం, ప్రాథమిక పాఠశాల కొనసాగుతున్నాయి. భవనం శిథిలావస్థలో ఉండటంతో ఎప్పుడు కూలిపోతుందోనన్న భయంతో విద్యార్థులు చదువుకుంటున్నారు.

చంపావతి నది ప్రవాహమే గ్రామస్థులకు మరో పెద్ద సమస్య. 5వ తరగతి దాటిన విద్యార్థులు పక్క గ్రామంలోని పాఠశాలకు వెళ్లేందుకు నది దాటాల్సి వస్తుంది. వర్షాకాలంలో డ్యామ్ నీరు విడుదలైనా, భారీ వర్షాలు కురిసినా నది ఉగ్రరూపం దాల్చుతుంది. అప్పుడు విద్యార్థులు, ఉపాధ్యాయులు రెండు మూడు రోజుల పాటు పాఠశాలకు రాలేకపోతున్నారు. వంతెన లేకపోవడంతో రోగులు సకాలంలో ఆసుపత్రికి చేరడం కూడా కష్టంగా మారింది.

గ్రామస్థులు ఎన్నో ఏళ్లుగా కొత్త పాఠశాల భవనం, నదిపై వంతెన కోసం ఎదురు చూస్తున్నారు. ఇటీవల విద్యాశాఖ అధికారులు పాఠశాలను సందర్శించి, మంత్రి దృష్టికి తీసుకెళ్లినట్లు ప్రధానోపాధ్యాయుడు తెలిపారు. దీంతో కొత్త పాఠశాల భవనం మంజూరైంది. అయితే భవన నిర్మాణం త్వరితగతిన పూర్తి చేయాలని ఆయన విజ్ఞప్తి చేశారు.

నదిపై వంతెన నిర్మాణంపై ఇప్పటికీ స్పష్టత లేదు. వర్షాకాలంలో రాకపోకలు నిలిచిపోయే ప్రమాదం కొనసాగుతూనే ఉంది. గ్రామస్థులు న్యాయమైన డిమాండ్లతో పోరాడుతున్నారని, అధికారులు స్పందించి త్వరగా పరిష్కారం చూపాలని స్థానికులు కోరుతున్నారు.