జలంధర్‌లో ₹5,470 కోట్ల పనులు ప్రారంభించిన ప్రధాని మోదీ; ఆప్ ప్రభుత్వంపై విమర్శలు

ప్రధాని నరేంద్ర మోదీ శనివారం జలంధర్‌లో ₹5,470 కోట్ల విలువైన అభివృద్ధి పనులను ప్రారంభించారు.

ఈ సందర్భంగా ఆయన పంజాబ్ లోని ఆమ్ ఆద్మీ పార్టీ (AAP) ప్రభుత్వంపై విమర్శలు చేశారు. పంజాబ్‌లో శాంతిభద్రతలు క్షీణించాయని, పోలీస్‌ స్టేషన్లపై బాంబు దాడులు జరుగుతున్నాయని ఆరోపించారు. డ్రగ్ స్మగ్లింగ్‌ను అరికట్టడంలో రాష్ట్ర ప్రభుత్వం విఫలమైందని అన్నారు.

"పంజాబ్‌ను ఆప్ ప్రభుత్వం నేరస్తులకు అడ్డాగా మార్చింది. నేర చరిత్ర, అవినీతి ఆరోపణలు ఎదుర్కొంటున్న నేతలు మంత్రులుగా ఉన్నారు" అని మోదీ విమర్శించారు.

కేంద్రంలో బీజేపీ ప్రభుత్వం అన్ని రాష్ట్రాల ప్రజలను సమానంగా చూస్తుందని, డబుల్ ఇంజిన్ సర్కారు ఉంటేనే పంజాబ్ వేగంగా అభివృద్ధి చెందుతుందని ఆయన అన్నారు. ఢిల్లీ మాదిరిగా పంజాబ్‌లో కూడా బీజేపీ అధికారంలోకి వస్తే అభివృద్ధి సాధ్యమవుతుందని పేర్కొన్నారు.

ఈ సభలో మాజీ క్రికెటర్ హర్భజన్ సింగ్ బీజేపీలో చేరారు. ఇటీవలే ఆప్‌కు రాజీనామా చేసిన ఆయనకు రాబోయే పంజాబ్ అసెంబ్లీ ఎన్నికల్లో కీలక బాధ్యతలు అప్పగించే అవకాశం ఉంది. AAP ప్రభుత్వం నుంచి ఈ విమర్శలపై స్పందన రావాల్సి ఉంది.