గ్రామ పంచాయతీ నిధులు ఇక బ్యాంకు ఖాతాల్లో జమ: మంత్రి పొంగులేటి శ్రీనివాస్‌రెడ్డి

తెలంగాణ రాష్ట్ర క్యాబినెట్ కీలక నిర్ణయాలు తీసుకుందని మంత్రి పొంగులేటి శ్రీనివాస్‌రెడ్డి తెలిపారు. సచివాలయంలో జరిగిన క్యాబినెట్ భేటీ తర్వాత ఆయన మీడియాతో మాట్లాడారు.

టెండర్ల వ్యవస్థలో ఏకరూపత కోసం రాష్ట్రంలోని అన్ని ఇంజనీరింగ్ విభాగాలను ఒకే చట్టం కిందకు తీసుకురావాలని నిర్ణయించినట్లు మంత్రి ప్రకటించారు. 1994 నాటి జీఓ నంబర్ 94 స్థానంలో కొత్త చట్టాన్ని శాసనసభలో ఆమోదింపజేయనున్నారు. దీనికోసం కేంద్ర ప్రభుత్వ సంస్థలు, నేషనల్ హైవేస్, రైల్వే తదితర రంగాల నిపుణులతో ఒక కమిటీని ఏర్పాటు చేస్తారు.

మున్సిపల్ కార్పొరేషన్లలో కో-ఆప్షన్ సభ్యులుగా 2019 చట్టంలో సవరణ చేసి, ఐదుగురితో పాటు ఒక ట్రాన్స్‌జెండర్‌కు స్థానం కల్పించేందుకు క్యాబినెట్ ఆమోదం తెలిపింది.

గ్రామ పంచాయతీలకు పన్నుల రూపంలో వచ్చే నిధులను ఇకపై ట్రెజరీలో కాకుండా, సమీపంలోని జాతీయ లేదా సహకార బ్యాంకుల్లో డిపాజిట్ చేయవచ్చు. ఈ మేరకు 2018 చట్టానికి సవరణ చేయడాన్ని క్యాబినెట్ ఆమోదించింది. దీనివల్ల పంచాయతీలకు నిధుల నిర్వహణ సులభతరం కానుందని మంత్రి తెలిపారు.