రాయదుర్గం భూమి వేలంపై ఎస్బీఐ పిటిషన్‌కు హైకోర్టు స్టే

తెలంగాణ హైకోర్టు రాయదుర్గంలోని భూమి వేలంపై స్టే ఇచ్చింది. ఈ భూమి తమకు కేటాయించబడిందంటూ ఎస్బీఐ కోర్టులో పిటిషన్ వేసింది. ప్రభుత్వం రాయదుర్గంలోని సర్వే నెంబర్ 83/1లోని 5.09 ఎకరాలను వేలం వేయాలని ప్రకటించింది. అయితే ఈ భూమిని 2010లో ఎస్బీఐకి కేటాయించారని, దీని కోసం ప్రభుత్వానికి రూ.13.33 కోట్లు చెల్లించామని ఎస్బీఐ వాదిస్తోంది. 2020, 2024లో భూకేటాయింపులు రద్దు చేయడంతో ఈ వివాదం కోర్టుకు చేరింది.

మే 4న టీజీఐఐఏఐసి అధికారులు ఎస్బీఐ అధికారులతో చర్చించిన అనంతరం రెండే రోజుల్లో వేలం నోటిఫికేషన్ జారీ చేశారు. ఎస్బీఐ వెంటనే కోర్టును ఆశ్రయించగా, తొలి విచారణలో కేసు జూన్‌కు వాయిదా పడింది. మే 20న ఎస్బీఐ వినతిపత్రాన్ని తిరస్కరించి ప్రభుత్వం మళ్లీ నోటిఫికేషన్ ఇవ్వడంతో ఎస్బీఐ మరోసారి కోర్టుకు వెళ్లింది. చివరికి హైకోర్టు ఈ వేలంపై మూడు వారాల పాటు స్టే ఉత్తర్వులు జారీ చేసింది.

ఈ వేలం ద్వారా ప్రభుత్వం సుమారు రూ.1500 కోట్ల ఆదాయం ఆశించినట్లు సమాచారం. ఎస్బీఐ వ్యతిరేకతతో ఆ ఆదాయానికి ఆటంకం ఏర్పడింది. మీడియా నివేదికల ప్రకారం, ఈ పరిణామంపై ప్రభుత్వం అసంతృప్తి వ్యక్తం చేసింది. ఎస్బీఐతో ఉన్న ఆర్థిక లావాదేవీలను పునఃసమీక్షించవచ్చని, ప్రభుత్వ డిపాజిట్లను ఇతర బ్యాంకులకు మార్చే అంశాన్ని పరిశీలిస్తున్నట్లు కూడా వార్తలు వచ్చాయి.

ప్రతి నెల రూ.20 నుంచి 23 వేల కోట్ల లావాదేవీలు ఎస్బీఐ ద్వారా జరుగుతున్నాయి. ప్రభుత్వ సంక్షేమ పథకాలు, వేతనాల చెల్లింపులు ఎస్బీఐపై ఆధారపడి ఉన్న నేపథ్యంలో, బ్యాంకుతో సంబంధాలు దెబ్బతింటే ప్రభుత్వానికే ఇబ్బంది ఎదురవుతుందని బ్యాంకింగ్ నిపుణులు అభిప్రాయపడ్డారు.