పెసర పంటలో తెగుళ్ల నివారణ: శాస్త్రవేత్తల సూచనలు

తెలంగాణలో ఖరీఫ్‌లో పెసర, మినుము పంటలు పూత, పిందె దశల్లో ఉన్నాయి. వాతావరణ మార్పుల కారణంగా కొన్ని ప్రాంతాల్లో చీడపీడలు, తెగుళ్లు ఆశిస్తున్నాయి. ఈ నేపథ్యంలో రైతులు ముందస్తు జాగ్రత్తలు తీసుకోవాలని మంచిర్యాల జిల్లా బెల్లంపల్లి కృషి విజ్ఞాన కేంద్రం (KVK) శాస్త్రవేత్తలు నాగరాజు, తిరుపతి సూచించారు.

వర్షాధారంగా సాగయ్యే ఈ పంటలు 55,000 నుంచి 80,000 హెక్టార్లలో విస్తరించాయి. సర్కోస్పోరా ఆకుమచ్చ తెగులు కనిపిస్తే లీటరు నీటికి 2.5-5 గ్రా. మ్యాంకోజెబ్ లేదా 1 గ్రా. కార్బెండజిమ్ పిచికారీ చేయాలి. బూడిద తెగులు ఉంటే 3 గ్రా. నీటిలో కరిగే గంధకం లేదా 1 గ్రా. డైనోక్యాప్ వాడాలి.

బ్యాక్టీరియా ఆకుమచ్చ తెగులుకు 10 లీటర్ల నీటికి 30 గ్రా. కాపర్ ఆక్సిక్లోరైడ్, 2 గ్రా. ప్లాంటామైసిన్ కలిపి పిచికారీ చేయాలి. తామర పురుగులు, తెల్లదోమలు వ్యాప్తి చేసే వైరస్ తెగుళ్ల (పల్లాకు, మొవ్వికుళ్ళు) నివారణకు జిగురుట్టలు (బ్లూ స్టిక్కీ ట్రాప్స్), వేపున ద్రావణం ఉపయోగించాలి. ఉదృతి ఎక్కువైతే తామర పురుగులకు అసిపేట్ (1.5 గ్రా./లీ.) లేదా ఫిప్రోనిల్ (2 మి.లీ./లీ.), తెల్లదోమకు ఇమిడాక్లోప్రిడ్ (0.3 మి.లీ./లీ.) లేదా థయామెతాక్సామ్ పిచికారీ చేయాలి.

వైరస్ తెగుళ్లను తట్టుకునేందుకు ఎ.డి.బి. 42, డబ్ల్యు.జి.జి. 37 రకాలను సాగు చేసుకోవాలని శాస్త్రవేత్తలు సూచించారు.