హైదరాబాద్-విజయవాడ మధ్య సీ ప్లేన్ టూరిజం ప్రతిపాదన

తెలంగాణ ప్రభుత్వం హైదరాబాద్ నుంచి విజయవాడ వరకు సీ ప్లేన్ టూరిజం సర్వీస్ను ప్రారంభించే ప్రతిపాదనను పరిశీలిస్తోంది.

ఇటీవల ఢిల్లీలో తెలంగాణ ముఖ్యమంత్రి రేవంత్ రెడ్డి కేంద్ర పౌర విమానయాన శాఖ మంత్రి రామ్మోహన్ నాయుడుతో భేటీ అయిన సందర్భంగా ఈ అంశంపై చర్చించారు. హైదరాబాద్లోని హుస్సేన్ సాగర్ నుంచి విజయవాడలోని ప్రకాశం బ్యారేజ్ వరకు సీ ప్లేన్ సేవలు నడిపితే రెండు రాష్ట్రాల మధ్య కొత్త పర్యాటక సర్క్యూట్ ఏర్పడుతుందని ఈ భేటీలో ప్రస్తావించారు.

ఈ ప్రతిపాదనపై ఎయిర్పోర్ట్స్ అథారిటీ ఆఫ్ ఇండియా (AAI) ఇప్పటికే హైదరాబాద్లోని హుసేన్ సాగర్లో క్షేత్రస్థాయి పరిశీలన పూర్తి చేసింది. టేకాఫ్, ల్యాండింగ్కు అనువైన ప్రాంతాలు, నీటి లోతు, ప్రయాణికుల భద్రత, బోర్డింగ్ ఏర్పాట్లపై సమగ్ర అధ్యయనం చేసినట్లు అధికారులు తెలిపారు. ప్రకాశం బ్యారేజీ పరిసరాల్లో కూడా ఇదే తరహా అధ్యయనం త్వరలో చేపట్టనున్నారు.

సీ ప్లేన్లకు సంప్రదాయ రన్వే అవసరం ఉండదు. నీటిపైనే టేకాఫ్, ల్యాండింగ్ చేయగలవు. ఈ సర్వీస్ను ప్రారంభిస్తే హుసేన్ సాగర్ వద్ద ప్రయాణం మొదలై, ట్యాంక్బండ్, బుద్ధ విగ్రహం, సచివాలయం వంటి నగర చిహ్నాలను ఆకాశం నుంచి చూస్తూ, కృష్ణా నది పరివాహక ప్రాంతాల మీదుగా ప్రయాణించి, ప్రకాశం బ్యారేజీ వద్ద ల్యాండ్ అవుతుంది. ఒక్కో సీ ప్లేన్లో 9 నుంచి 12 మంది ప్రయాణికులు ప్రయాణించవచ్చు.

గతంలోనూ హుసేన్ సాగర్, నాగార్జున సాగర్, ప్రకాశం బ్యారేజీల మధ్య సీ ప్లేన్ సేవల ప్రతిపాదనలు వచ్చాయి. ఆంధ్రప్రదేశ్లో ట్రయల్ రన్లు కూడా జరిగినా పూర్తి స్థాయి సేవలు అందుబాటులోకి రాలేదు. అయితే తెలంగాణ 2025 టూరిజం రోడ్మ్యాప్లో భాగంగా ఈ ప్రాజెక్టును తీవ్రంగా పరిశీలిస్తున్నారు. రెండు రాష్ట్రాల సమన్వయం, అవసరమైన అనుమతులు, భద్రతా ప్రమాణాలు తుది రూపం దాలిస్తే ఈ సీ ప్లేన్ టూరిజం సర్వీస్ అందుబాటులోకి రానుంది.