భారీ వర్షాలు: బొగత జలపాతం వద్ద జాగ్రత్తగా ఉండాలని మంత్రి సీతక్క హెచ్చరిక, వరద బాధితులకు ఆర్థిక సాయం

మంత్రి సీతక్క ములుగు జిల్లా పర్యటనలో వరద బాధితులకు సహాయం అందించారు, జలపాతాల వద్ద జాగ్రత్తగా ఉండాలని సూచించారు.

ఆదివారం మంత్రి మంగపేటలోని పునరావాస కేంద్రాన్ని సందర్శించి ముంపు బాధితులతో మాట్లాడారు. వారికి అండగా ఉంటామని భరోసా కల్పించారు.

వాజేడులో విద్యుతాఘాతం కారణంగా పూరి గుడిసె దగ్దమైన ఓ కుటుంబానికి ఆమె ఆర్థిక సాయం అందజేశారు. ఆ కుటుంబానికి ఇందిరమ్మ ఇల్లు మంజూరు చేయాలని అధికారులను ఆదేశించారు.

అనంతరం చీకుపల్లి సమీపంలోని బొగత జలపాతాన్ని సందర్శించిన సీతక్క, భారీ వర్షాలు, వరదల కారణంగా ప్రమాదకరంగా ఉన్న నేపథ్యంలో పర్యాటకులు అప్రమత్తంగా ఉండాలని కోరారు. బొగత జలపాతాన్ని మాత్రమే సందర్శించాలని, ఇతర జలపాతాల వద్దకు వెళ్లొద్దని సూచించారు.

మహారాష్ట్ర, ఛత్తీస్‌గఢ్‌లో ఎగువ ప్రాంతాల్లో కురుస్తున్న భారీ వర్షాలతో గోదావరి నదిలో వరద ప్రవాహం పెరిగింది. గోదావరి, ఇంద్రావతి నదీ పరివాహక ప్రాంతాల ప్రజలు అప్రమత్తంగా ఉండాలని మంత్రి సీతక్క సూచించారు.