బాలల దినోత్సవం: పోషకాహార లోపం గుర్తింపుకు AI వ్యవస్థ ప్రారంభించిన మంత్రి సీతక్క

హైదరాబాద్ బంజారాహిల్స్‌లోని బాబు జగజీవన్‌రామ్ భవన్‌లో బాలల దినోత్సవ వేడుకలు జరిగాయి. మహిళా, శిశు సంక్షేమ శాఖ ఆధ్వర్యంలో ఈ కార్యక్రమాన్ని నిర్వహించారు. ఈ వేడుకల్లో రాష్ట్ర మంత్రి సీతక్క పాల్గొన్నారు.

చిన్నారుల్లో పోషకాహార లోపాన్ని గుర్తించి పర్యవేక్షించేందుకు ఒక AI ఆధారిత వ్యవస్థను మంత్రి సీతక్క ప్రారంభించారు. బాల్య వివాహాల నిర్మూలన కోసం 100 రోజుల ప్రత్యేక ప్రచార కార్యక్రమం పోస్టర్‌ను కూడా ఆమె ఆవిష్కరించారు.

బాలల సంరక్షణ, దత్తత వ్యవస్థను మరింత విస్తరించేందుకు ఆరు కొత్త ప్రత్యేక దత్తత సంస్థలను ఏర్పాటు చేశారు. హైదరాబాద్, మహబూబ్‌నగర్, మెదక్, రంగారెడ్డి జిల్లాల్లో నాలుగు కొత్త చైల్డ్‌లైన్ సహాయ కేంద్రాలు కూడా ప్రారంభమయ్యాయి.

కార్యక్రమంలో చిన్నారుల నృత్య ప్రదర్శనలు జరిగాయి. చిల్డ్రన్ హోమ్ పిల్లలు మొబైల్ వ్యసనంపై ఒక నాటకం ప్రదర్శించారు.

దేశ తొలి ప్రధాని జవహర్‌లాల్ నెహ్రూ జయంతి సందర్భంగా దేశవ్యాప్తంగా బాలల దినోత్సవం నిర్వహిస్తున్నట్టు మంత్రి సీతక్క తెలిపారు. పిల్లల సంరక్షణ, విద్య, పునరావాసం కోసం ముఖ్యమంత్రి రేవంత్ రెడ్డి ప్రభుత్వం కట్టుబడి ఉందని ఆమె చెప్పారు. అంగనవాడీ కేంద్రాలను పాఠశాలలుగా అభివృద్ధి చేస్తున్నట్టు ఆమె పేర్కొన్నారు.