ప్రపంచ తల్లిపాల వారోత్సవాలను ప్రతి గ్రామంలో నిర్వహించాలని మంత్రి సీతక్క విజ్ఞప్తి

ప్రపంచ తల్లిపాల వారోత్సవాలను ఈ ఏడాది ఆగస్టు 1 నుంచి 7 వరకు నిర్వహిస్తున్నారు. తెలంగాణ రాష్ట్ర మహిళా, శిశు సంక్షేమ శాఖ మంత్రి సీతక్క ఈ సందర్భంగా ప్రతి గ్రామం, ప్రతి వార్డులో ప్రజా చైతన్య కార్యక్రమాలు చేపట్టాలని అధికారులను ఆదేశించారు.

శిశువు జన్మించిన మొదటి గంటలోనే తల్లిపాలు ప్రారంభించాలని, తొలి ఆరు నెలలు కేవలం తల్లిపాలనే అందించాలని అనంతరం రెండేళ్ల వరకు పిల్లల వయసుకు తగిన ఆహారంతో పాటు తల్లిపాలను కొనసాగించాలని మంత్రి సూచించారు.

గర్భిణీలు, బాలింతలు, వారి కుటుంబ సభ్యుల్లో తల్లిపాల ప్రాముఖ్యతపై శాస్త్రీయ అవగాహన కల్పించాలని, ఈ విషయంలో ఉన్న అపోహలను తొలగించాలని ఆమె పేర్కొన్నారు. ఆరోగ్యవంతమైన సమాజానికి పునాది ఆరోగ్యకరమైన చిన్నారులేనని, చిన్నారుల ఆరోగ్యానికి తల్లిపాలు అత్యంత బలమైన ఆధారమని మంత్రి వివరించారు.

'బిడ్డకు తల్లి పాలు తాగే హక్కు ఉంది. కనీసం ఆరు నెలల నుంచి ఒక ఏడాది వరకైనా తల్లి పాలు ఇవ్వాల్సిన బాధ్యత ప్రతి తల్లికీ ఉంది' అని మంత్రి సీతక్క అన్నారు. రాష్ట్ర వ్యాప్తంగా ఈ వారోత్సవాలు నిర్వహించాలని ఆదేశించారు.