విశాఖ నుంచి వేటకు వెళ్లిన ఏడుగురు మత్స్యకారులు గల్లంతు

విశాఖపట్నం నుంచి చేపల వేటకు వెళ్లిన ఏడుగురు మత్స్యకారులు గల్లంతయ్యారు. ఈ నెల 1వ తేదీ తెల్లవారుజామున 3 గంటలకు, వారు విశాఖ షిప్పింగ్ హార్బర్ నుంచి బయలుదేరారు.

వీరు ప్రయాణిస్తున్న బోటు రిజిస్ట్రేషన్ నంబర్ IND AP M V-583. బోట్ డ్రైవర్, యజమాని అయిన కారి చిన్న తన కుటుంబానికి మూడు గంటల్లో తిరిగి వస్తామని చెప్పారు. కానీ, నిన్న మధ్యాహ్నం వారు తిరుగు ప్రయాణం మొదలుపెట్టిన తర్వాత నుంచి ఎలాంటి సమాచారం లేదు.

గల్లంతైన వారిలో ఆరుగురు విజయనగరం జిల్లా భోగాపురం మండలం ముక్కాం గ్రామానికి చెందినవారు. మరొకరు విశాఖ జిల్లా భీమిలి మండలం పెదనాగమయ్యపాలెం గ్రామానికి చెందిన మత్స్యకారుడు. వారి వద్ద ఉన్న ఆరు సెల్ ఫోన్లు స్విచ్ ఆఫ్ కావడంతో కుటుంబ సభ్యులు తీవ్ర ఆందోళనలో ఉన్నారు.

బంగాళాఖాతంలో అల్పపీడనం ప్రభావంతో ప్రతికూల వాతావరణం ఏర్పడింది. ఉత్తరాంధ్ర తీరంలో రాబోయే ఐదు రోజుల పాటు చేపల వేటను నిషేధించారు. వాతావరణం అనుకూలంగా లేకపోవడంతో, మత్స్యకారులు సురక్షితంగా ఎక్కడైనా చేరారా లేదా అనే ఆందోళన కలుగుతోంది.

ఏపీ మెకనైజ్డ్ బోట్స్ అసోసియేషన్ ఈ విషయాన్ని ప్రభుత్వం దృష్టికి తీసుకెళ్లింది. ఇప్పటివరకు వారి ఆచూకీ లభించలేదు. బాధిత కుటుంబాలు వెంటనే గాలింపు చర్యలు చేపట్టాలని ప్రభుత్వాన్ని కోరుతున్నాయి.