కర్నూలు జిల్లా మంత్రాలయంలో తీవ్ర నీటి కొరత; ఉప్పరహాల్‌లో నెలరోజులుగా తాగునీటి ఇబ్బందులు

కర్నూలు జిల్లా మంత్రాలయం నియోజకవర్గంలో తీవ్ర నీటి కొరత ఏర్పడింది. కౌతాళం, కోస్గి, మంత్రాలయం గ్రామాల సమీపంలో తుంగభద్ర నది పూర్తిగా ఎండిపోయింది. నది ఇసుక మెట్టలతో ఎడారిని తలపిస్తోంది. సాగునీరు, తాగునీరు అందుబాటులో లేక రైతులు, గ్రామస్తులు తీవ్ర ఇబ్బందులు పడుతున్నారు.

ముఖ్యంగా ఉప్పరహాల్ గ్రామంలో గత నెల రోజులుగా తాగునీరు లేదు. గ్రామస్తులు చెరువులోని మురికి నీటిని వడపోసి తాగుతున్నారు. ఈ నీరు పశువులు కూడా తాగలేని స్థితిలో ఉంది. ప్రతిరోజూ 6 కిలోమీటర్ల దూరంలోని ఇతర గ్రామాలకు వెళ్లి నీరు తెచ్చుకోవాల్సిన పరిస్థితి నెలకొంది. బోరు నీరు ఉప్పగా ఉండడంతో తాగడానికి పనికిరాకపోగా, ఫిల్టర్ నీరు కొనుగోలు చేయలేని దుస్థితిలో ఉన్నారు.

తుంగభద్ర నదిలో నీటి ప్రవాహం పునరుద్ధరించాలని, తక్షణ సహాయం అందించాలని స్థానికులు ప్రభుత్వాన్ని కోరుతున్నారు. వర్షాలు కురిసి కాలువల ద్వారా నీరు వస్తేనే చెరువుకు నీరు వదులుతామని అధికారులు తెలిపారని గ్రామస్తులు చెబుతున్నారు. ప్రస్తుతానికి మాత్రం నీటి ఎద్దడి తీవ్రంగా ఉంది.