షాబాద్ హత్యల కేసు: నిందితుడి కోసం పోలీసుల తీవ్ర గాలింపు

షాబాద్ లో ఆరుగురి హత్య కేసులో నిందితుడి కోసం పోలీసులు గాలింపు చర్యలు ముమ్మరం చేశారు. ఎనిమిది ప్రత్యేక బృందాలు రంగంలో ఉన్నాయి. సిపి తరుణ్ జోషి నిందితుడిని పట్టిచ్చిన వారికి రెండు లక్షల రూపాయల నగదు బహుమతి ప్రకటించారు.

పోలీసుల కథనం ప్రకారం, నిందితుడు రాజ్కుమార్ శుక్రవారం రాత్రి మొదట తన భార్య, ఇద్దరు చిన్న కుమారులను హత్య చేశాడు. ఆ తర్వాత షాబాద్ లో ఒక మైనర్ బాలిక, ఆమె తల్లి, అమ్మమ్మలను కూడా హత్య చేశాడు. మొత్తం ఆరుగురు మృతి చెందారు.

రాజ్కుమార్ పై గతంలో పోక్సో చట్టం కింద కేసు నమోదైంది. ఆ కేసు దర్యాప్తులో లోపాలు జరిగాయని ఓ ఎస్ఐని సస్పెండ్ చేశారు. ఈ ఆరు హత్యలు ఆ కక్ష్యతోనే చేసినట్లు పోలీసులు అనుమానిస్తున్నారు.

హత్యల అనంతరం రాజ్కుమార్ షాద్ నగర్ లో సెల్ఫ్ డ్రైవ్ కారు అద్దెకు తీసుకొని పారిపోయాడు. ఆ కారు చేగూర్ రైల్వే స్టేషన్ సమీపంలో గుర్తించగా, అతడి సెల్ ఫోన్ సిగ్నల్ కూడా అదే ప్రాంతంలో చివరిసారిగా కనిపించింది. దీంతో అతను శ్రీశైలం వైపు వెళ్లి ఉండొచ్చని పోలీసులు భావిస్తున్నారు. రెండు ప్రత్యేక బృందాలు ఆ ప్రాంతంలో గాలిస్తున్నాయి.

పోలీసులు బస్ స్టాండ్లు, రైల్వే స్టేషన్లు, హోటళ్లు, చెక్ పోస్టుల్లో అప్రమత్తం చేశారు. నిందితుడి తండ్రి, బంధువులను అదుపులోకి తీసుకుని విచారిస్తున్నారు. సాంకేతిక ఆధారాలు, సీసీ కెమెరా ఫుటేజీ ఆధారంగా దర్యాప్తు కొనసాగుతోంది. ప్రజలు సమాచారం ఇస్తే వారి వివరాలు గోప్యంగా ఉంచుతామని పోలీసులు తెలిపారు.