షాబాద్ వరస హత్యల కేసులో నిందితుడి కోసం 10 ప్రత్యేక బృందాల గాలింపు

రంగారెడ్డి జిల్లా షాబాద్‌లో శుక్రవారం రాత్రి జరిగిన వరుస హత్యల కేసులో నిందితుడు రాజ్‌కుమార్ కోసం పోలీసులు 10 ప్రత్యేక బృందాలతో విస్తృతంగా గాలిస్తున్నారు. హత్యల తర్వాత నిందితుడు పరారీలో ఉండగా, అతడి ఆచూకీ కోసం పోలీసులు రాష్ట్రవ్యాప్తంగా శోధన కొనసాగిస్తున్నారు.

సిసీ కెమెరాలు, ఇతర సమాచారాన్ని విశ్లేషించిన పోలీసులు తిమ్మాపూర్ రైల్వే స్టేషన్ సమీపంలో నిందితుడు వదిలి వెళ్ళిన కారును స్వాధీనం చేసుకున్నారు. ఈ కారును షాద్‌నగర్‌లో అద్దెకు తీసుకున్నట్లు గుర్తించారు.

నిందితుడి తల్లి, సమీప బంధువులు, అతడి కాల్‌డేటాలోని వ్యక్తులు ఉన్న ప్రాంతాల్లో పోలీసులు గాలిస్తున్నారు. అంతేకాకుండా, హత్యలు చేసిన తర్వాత నిందితుడు తన తండ్రికి ఫోన్ చేసి ఆత్మహత్య చేసుకుంటానని చెప్పినట్లు పోలీసులు తెలిపారు. గత ఏడాది అక్టోబర్‌లో కూడా అతడు ఒకసారి ఆత్మహత్యాయత్నం చేసినట్లు స్థానికులు చెప్పారు. ఈ నేపథ్యంలో, నిందితుడు ఆత్మహత్య చేసుకుని ఉండొచ్చా అనే కోణంలో కూడా దర్యాప్తు చేస్తున్నారు.

మరోవైపు, నిందితుడు రైలులో ఇతర రాష్ట్రాలకు పారిపోయి ఉండవచ్చనే అనుమానంతో పోలీసులు ఆ కోణంలోనూ ఆరా తీస్తున్నారు. 10 ప్రత్యేక బృందాలు పలుచోట్ల గాలింపు చర్యలు కొనసాగిస్తున్నాయి.