జూన్ 13న శని త్రయోదశి, మాస శివరాత్రి – ఈ రాశుల వారికి ప్రత్యేక పరిహారాలు

జూన్ 13 శనివారం నాడు శని త్రయోదశి, మాస శివరాత్రి రెండూ కలిసి వస్తున్నాయి. ఈ రోజు అధిక జ్యేష్ఠ మాసంలో రావడం విశేషం.

జ్యోతిష్య నిపుణులు శ్రీనాథ్ స్వామి వివరాల ప్రకారం, 19 సంవత్సరాల తర్వాత ఇలా శని త్రయోదశి అధిక మాసంలో వస్తోంది. కుంభ, మీన, మేష, సింహ, ధనస్సు రాశుల వారికి శని ప్రభావం ఎక్కువగా ఉండడంతో ప్రత్యేక పూజలు చేయాలని సూచించారు.

శని హోర (సూర్యోదయం తర్వాత మొదటి రెండు గంటలు) సమయంలో శనీశ్వరుడికి నువ్వుల నూనెతో అభిషేకం చేయాలి. నల్ల నువ్వులు, జిల్లేడు పూలు, శమీ ఆకులు, నీలం రంగు పూలతో అర్చన చేయాలి. బెల్లం నైవేద్యం సమర్పించి, నువ్వుల నూనెతో దీపం వెలిగించాలి.

19 ప్రదక్షిణలు చేసి, ‘ఓం శం శనేశ్చరాయ నమః’ మంత్రాన్ని 19 వేల సార్లు గానీ, సాధ్యమైనన్ని సార్లు గానీ జపించాలి. ఆలయానికి వెళ్లలేనివారు ఇంట్లో నుంచే ఈ మంత్రాన్ని పఠిస్తే సరిపోతుందని ఆయన తెలిపారు.

ఈ పరిహారాలు చేయడం వల్ల శని దోష నివారణ జరిగి, జీవితంలో ఆటంకాలు తొలగిపోతాయని శ్రీనాథ్ స్వామి పేర్కొన్నారు.