శ్రావణ మాసంతో రావులపాలెం అరటి మార్కెట్‌కు పెరిగిన గిరాకీ

శ్రావణ మాసం పండుగ సీజన్ నేపథ్యంలో అంబేద్కర్ కోనసీమ జిల్లా రావులపాలెం అరటి మార్కెట్‌లో గిరాకీ భారీగా పెరిగింది. అరటి గెలలకు డిమాండ్ పెరగడంతో ధరలు రికార్డు స్థాయికి చేరాయి. మార్కెట్ యార్డ్ రైతులు, కొనుగోలుదారులతో సందడిగా మారింది.

మార్కెట్ వర్గాల సమాచారం ప్రకారం ఒక్కో అరటి గెల ధర ₹800 నుంచి ₹1000 వరకు పలుకుతోంది. గత 15 రోజులుగా ధరలు క్రమంగా పెరుగుతూ వచ్చాయి. దీంతో రైతులు ఊహించని స్థాయిలో ఆదాయం పొందుతున్నారు. చాలా కాలం తర్వాత గిట్టుబాటు ధర లభించిందని రైతులు చెబుతున్నారు.

దేశంలోని వివిధ రాష్ట్రాల నుంచి వ్యాపారులు నేరుగా రావులపాలెం మార్కెట్‌కు వచ్చి కొనుగోళ్లు చేస్తున్నారు. కర్పూర చక్కరకాయ రకం అరటి పండ్లకు అత్యధిక గిరాకీ ఉంది. ఇతర రకాల అరటి గెలలను కూడా వ్యాపారులు పోటీపడి కొంటున్నారు. వ్యాపారులు ఒక్కో లోడుకు ₹4000 నుంచి ₹6000 వరకు అదనంగా చెల్లిస్తున్నట్లు మార్కెట్ వర్గాలు తెలిపాయి.

శ్రావణ మాసం తర్వాత ధరలు కొద్దిగా తగ్గవచ్చని కొందరు వ్యాపారులు అంచనా వేస్తున్నారు. అయితే ఈ డిమాండ్ వినాయక చవితి, దసరా వరకు కొనసాగే అవకాశం ఉందని రైతులు అభిప్రాయపడుతున్నారు.