సిద్ధరామయ్య ఇకపై ఏ ఎన్నికల్లోనూ పోటీ చేయబోనని ప్రకటన

కర్ణాటక మాజీ ముఖ్యమంత్రి, కాంగ్రెస్ సీనియర్ నేత సిద్ధరామయ్య ఇకపై ఏ ఎన్నికల్లోనూ పోటీ చేయబోనని ప్రకటించారు. మండ్యా జిల్లా కేఆర్ పేటలో జరిగిన ఒక ప్రైవేట్ కార్యక్రమంలో ఆయన ఈ విషయం తెలిపారు.

2028 శాసనసభ ఎన్నికలతో సహా భవిష్యత్తులో జరిగే ఏ ఎన్నికల్లోనూ పోటీ చేయకూడదని నిర్ణయించుకున్నట్టు చెప్పారు. ప్రస్తుతం తనకు 79 ఏళ్ళు; 2028 నాటికి 82 ఏళ్ళు వస్తాయని, అప్పటికి రాజకీయ జీవితం 50 ఏళ్ళు పూర్తవుతుందని వివరించారు. ఆరోగ్యం గతంలోలా సహకరించడం లేదన్నారు.

ఇప్పుడు ఎన్నికల్లో పోటీ చేయాలంటే ప్రజలకు డబ్బులు ఇవ్వాల్సిన పరిస్థితి వచ్చిందని, రాజకీయ వ్యవస్థ పూర్తిగా అవినీతిమయంగా మారిందని సిద్ధరామయ్య ఆరోపించారు. నిజాయితీ రాజకీయాలకు చోటు లేకుండా పోతోందని ఆవేదన వ్యక్తం చేశారు.

వరుణ నియోజకవర్గ ప్రజలు తనపై ఒత్తిడి తెస్తున్నప్పటికీ, ఎన్నికలకు దూరంగా ఉండాలన్న నిర్ణయం తీసుకున్నట్టు తెలిపారు. మిగిలిన జీవితాన్ని ప్రజాసేవకు అంకితం చేస్తానని స్పష్టం చేశారు.