గోదావరిఖని సింగరేణి ఆసుపత్రిలో క్యాథ్ ల్యాబ్ సేవలు ప్రారంభం

పెద్దపల్లి జిల్లా గోదావరిఖనిలోని సింగరేణి ఏరియా ఆసుపత్రిలో క్యాథ్ ల్యాబ్ అందుబాటులోకి వచ్చింది. గుండెపోటుకు గురైన కార్మికులు, ఉద్యోగులకు తక్షణ వైద్యం అందించేందుకు ఈ ల్యాబ్ ఏర్పాటు చేశారు.

రామగుండం, మంచిర్యాల, భూపాలపల్లి తదితర ప్రాంతాల ప్రజలు గతంలో కరీంనగర్, హైదరాబాద్ వంటి సుదూర నగరాలకు వెళ్లాల్సి వచ్చేది. ఆలస్యం కారణంగా ప్రాణాలు కోల్పోతున్న నేపథ్యంలో సింగరేణి యాజమాన్యం స్థానికంగా కార్డియాక్ సేవలను తీసుకురావాలని నిర్ణయించింది.

18 కోట్ల రూపాయలతో ఏర్పాటైన ఈ క్యాథ్ ల్యాబ్‌లో 2డి ఎకో, టీఎమ్‌టీ, ఈసీజీ, యాంజియోగ్రామ్, స్టంటింగ్, తాత్కాలిక-శాశ్వత పేస్‌మేకర్ వంటి అత్యాధునిక చికిత్సలున్నాయి. పబ్లిక్-ప్రైవేట్ భాగస్వామ్యంతో నిర్మించిన ఈ ల్యాబ్ నిర్వహణ బాధ్యతను ఏడేళ్ల కాలానికి కరీంనగర్‌కు చెందిన రెనే హాస్పిటల్ కు అప్పగించారు.

మొత్తం 15 బెడ్లు ఉన్నాయి. వీటిలో 8 బెడ్లు సింగరేణి కార్మికులు, ఉద్యోగులు, వారి కుటుంబాలకు ప్రత్యేకించారు. మిగిలిన 7 బెడ్లు స్థానిక ప్రైవేటు వ్యక్తులకు అందుబాటులో ఉంటాయి. కేంద్ర ప్రభుత్వ ఆరోగ్య పథకం (సీజీహెచ్‌ఎస్) రేట్లలోనే వైద్య సేవలు అందిస్తారు.

ప్రస్తుతం ప్రయోగాత్మకంగా సేవలు ప్రారంభమై దాదాపు నెలరోజులు గడిచింది. నిత్యం 30-40 మంది ఓపీ సేవలు పొందుతున్నారు. ఇప్పటికే 10 మంది ఇన్‌పేషెంట్‌లకు చికిత్స అందించారు. త్వరలో అధికారిక ప్రారంభోత్సవం జరగనుంది.