గోదావరిఖనిలో సింగరేణి డిపెండెంట్ కార్మికుల నిరసన, ఉద్యోగాల డిమాండ్

గోదావరిఖనిలో సింగరేణి జనరల్ మేనేజర్ కార్యాలయం ఎదుట డిపెండెంట్ కార్మికులు నిరసన ప్రదర్శన చేపట్టారు. మారుపేర్ల సమస్య పరిష్కరించాలని, పెండింగ్ విజిలెన్స్ కేసులకు వన్ టైం సెటిల్మెంట్ ఇవ్వాలని, ఉద్యోగాలు కల్పించాలని డిమాండ్ చేశారు.

కాంగ్రెస్ ప్రభుత్వం డిపెండెంట్ కార్మికులకు ఉద్యోగాలు ఇస్తామని హామీ ఇచ్చిందని, ఆ హామీని నెరవేర్చాలని కార్మికులు కోరారు. గత 35 సంవత్సరాలుగా తమ కుటుంబాలు సింగరేణిలో ఉద్యోగాలు చేస్తున్నాయని, డిపెండెంట్ ఉద్యోగాల కోసం పేర్లు నమోదు చేసినా విజిలెన్స్ విచారణ మారుపేర్ల కారణంగా ఉద్యోగాలు ఇవ్వడం లేదని వారు ఆరోపించారు. ఈ ఆలస్యం వల్ల ఇప్పటికే ఇద్దరు ప్రాణాలు కోల్పోయారని తెలిపారు.

“మా సమస్యపై గతంలో పలుమార్లు మెమోరాండాలు ఇచ్చినా పట్టించుకోలేదు. ప్రజా ప్రతినిధులు, ట్రేడ్ యూనియన్లు కూడా సహాయం చేయలేదు. ఈసారి డిమాండ్లు నెరవేరకపోతే పెద్ద ఎత్తున ఆందోళన చేపడతామ”ని కార్మికులు హెచ్చరించారు. ఈ విషయంలో సింగరేణి యాజమాన్యం స్పందన తెలియాల్సి ఉంది.