SIR 2026: ఎన్యుమరేషన్ ఫారమ్ నింపే విధానం అడుగడుగునా వివరణ

భారత రాజ్యాంగంలోని 324వ అధికరణం మరియు ప్రజా ప్రాతినిధ్య చట్టం 1950 లోని సెక్షన్ 21 ప్రకారం భారత ఎన్నికల సంఘం ఓటర్ జాబితాను సవరించే అధికారాన్ని కలిగి ఉంది. 2002 నుండి 2005 మధ్య జరిగిన స్పెషల్ ఇంటెన్సివ్ రివిజన్ తర్వాత దాదాపు 20 సంవత్సరాలకు మళ్ళీ ఈ ప్రక్రియ చేపట్టడం జరిగింది. ఇప్పటికే 15 రాష్ట్రాలు మరియు కేంద్రపాలిత ప్రాంతాలలో రెండు దశలలో SIR పూర్తయింది. మూడవ దశలో తెలంగాణలో ఈ ప్రక్రియ ప్రారంభమైంది.

ఈ ప్రక్రియలో మొత్తం ఐదు దశలు ఉంటాయి. మొదటి దశ అయిన ఎన్యుమరేషన్ దశ జూన్ 25 నుండి జూలై 24 వరకు జరుగుతుంది. జూలై 31 న ముసాయిదా ఓటర్ జాబితాను ప్రచురిస్తారు. తర్వాత దశలో అభ్యంతరాలు మరియు కొత్త దరఖాస్తులు స్వీకరిస్తారు. నోటీసుల జారీ మరియు పరిష్కారం జూలై 31 నుండి సెప్టెంబర్ 28 వరకు జరుగుతుంది. అన్ని ప్రక్రియలు పూర్తయిన తర్వాత అక్టోబర్ 1, 2026 న తుది జాబితా ప్రచురిస్తారు.

ఈ ప్రక్రియలో BLO లు ఇంటింటికి వెళ్ళి జూన్ 10, 2026 నాటి ఓటర్ జాబితాలో నమోదైన చిరునామాలకు వెళ్ళి ఎన్యుమరేషన్ ఫారమ్‌లు అందిస్తారు. ప్రతి ఓటరుకు రెండు ఫారమ్‌లు ఇస్తారు. ఒకటి ఓటరు తన దగ్గర ఉంచుకుంటారు, రెండవది BLO కి ఇస్తారు. BLO ఫారమ్ తీసుకున్న తర్వాత అక్నాలెడ్జ్‌మెంట్ ఇస్తారు.

ఎన్యుమరేషన్ ఫారమ్ ఇచ్చిన అందరి పేర్లు ముసాయిదా జాబితాలో తప్పనిసరిగా ఉంటాయి. ఫారమ్ ఇవ్వని వారి వివరాలను పోలింగ్ స్టేషన్ వారీగా పబ్లిక్ కార్యాలయాలలో ప్రదర్శిస్తారు. ఎన్యుమరేషన్ దశలో ఏ పత్రాలు కూడా సేకరించరు. ముసాయిదా జాబితా ప్రచురణ తర్వాత తప్పులు ఉన్న వారికి నోటీసులు జారీ చేస్తారు. సరైన విచారణ లేకుండా ఒక్క పేరు కూడా తొలగించరు.

SIR యొక్క ప్రధాన లక్ష్యం అర్హులైన ప్రతి ఓటరు జాబితాలో ఉండటం మరియు అనర్హులను తొలగించడం. భారత రాజ్యాంగంలోని 325, 326 అధికరణాల ప్రకారం ఓటరుగా నమోదు కావాలంటే భారతీయ పౌరుడై ఉండటం, అర్హత తేదీ నాటికి 18 సంవత్సరాలు నిండి ఉండటం మరియు సంబంధిత నియోజకవర్గంలో సాధారణ నివాసి అయి ఉండటం అవసరం.

ప్రజా ప్రాతినిధ్య చట్టం సెక్షన్ 17 ప్రకారం ఒకటి కంటే ఎక్కువ నియోజకవర్గాలలో ఓటు నమోదు చేసుకోవడానికి వీలు లేదు. సెక్షన్ 18 ప్రకారం ఒకే నియోజకవర్గంలో రెండు చోట్ల నమోదు చేసుకోవడానికి వీలు లేదు. ఎన్యుమరేషన్ ఫారమ్‌లో నాల్గవ భాగంలో ఒక డిక్లరేషన్ ఉంటుంది. తప్పుడు సమాచారం ఇస్తే సెక్షన్ 31 ప్రకారం ఒక సంవత్సరం జైలు శిక్ష లేదా జరిమానా విధించబడుతుంది.

ECI NET మొబైల్ యాప్ ద్వారా Android మరియు iOS వినియోగదారులు ముసాయిదా జాబితాలో తమ పేరు ఉందో లేదో తెలుసుకోవచ్చు. voters.eci.gov.in వెబ్‌సైట్‌లో కూడా ఈ సమాచారం అందుబాటులో ఉంటుంది. ముసాయిదా జాబితాలో పేరు రాని వారు జూలై 31 నుండి ఆగస్టు 30 వరకు Form 6 ద్వారా ఆన్‌లైన్ లేదా ఆఫ్‌లైన్‌లో దరఖాస్తు చేసుకోవచ్చు.