పాతబస్తీలో ఎస్ఐఆర్ ప్రక్రియ రాజకీయ కేంద్రంగా మారింది; ఎంఐఎం నేతలు ఇంటింటికి తిరిగి ప్రచారం

స్పెషల్ ఇంటెన్సివ్ రివిజన్ (ఎస్ఐఆర్) ప్రక్రియ గడువు మరో 10 రోజులు మాత్రమే మిగిలి ఉన్న నేపథ్యంలో హైదరాబాద్ పాతబస్తీలో ప్రత్యేక పరిస్థితి కనిపిస్తుంది. దాదాపు అన్ని నియోజకవర్గాల్లో 70 శాతానికిపైగా ఓటర్ల నమోదు జరిగినట్లు అధికారులు తెలిపినా, పాతబస్తీలో మాత్రం ఓటర్లు, నేతల్లో టెన్షన్ ఎక్కువగా ఉంది.

హైదరాబాద్ పార్లమెంట్ పరిధిలోని పాతబస్తీ ప్రాంతంలో ఎంఐఎం నాయకులు ఇంటింటికి తిరిగి కుటుంబ రిజిస్ట్రేషన్ ప్రక్రియ వేగవంతం చేస్తున్నారు. ఈ ప్రక్రియపై గతంలో ప్రజలకు అవగాహన కల్పించిన నాయకులు ఇప్పుడు ప్రతి కుటుంబం నమోదు చేసుకునేలా క్షేత్ర స్థాయిలో చురుగ్గా పనిచేస్తున్నారు. హైదరాబాద్ ఎంపీ అసదుద్దీన్ ఒవైసీ కూడా ఈ ప్రయత్నంలో కీలక పాత్ర పోషిస్తున్నట్లు సమాచారం.

ప్రజలు మీసేవ, రెవెన్యూ కార్యాలయాల చుట్టూ తిరుగుతుండగా, అధికారులు, ఏజెంట్లు అధిక మొత్తంలో డబ్బులు వసూలు చేస్తున్నారనే ఆరోపణలు వెల్లువెత్తినాయి. పలువురు ప్రజాప్రతినిధులు నేరుగా ఈ కేంద్రాలకు వెళ్లి నిర్వాహకులను హెచ్చరించారు. ప్రజల అవసరాన్ని అవకాశంగా మార్చుకుని డబ్బులు వసూలు చేస్తే కఠిన చర్యలు తప్పవని స్పష్టం చేశారు.

ఎస్ఐఆర్ ప్రక్రియ కేవలం ఓటర్ జాబితా సవరణకే పరిమితం కాకుండా రాజకీయ వ్యూహాలకు కేంద్ర బిందువుగా మారింది. రాష్ట్రంలోని ఇతర ప్రాంతాల్లో ఈ ప్రక్రియ నిశ్శబ్దంగా సాగుతుండగా, పాతబస్తీలో మాత్రం తీవ్ర హడావిడి నెలకొన్నది. గడువు దగ్గరపడుతున్నందున రాజకీయ పార్టీలు మరింత చురుకైన ప్రచారంతో రంగంలోకి దిగాయి.