తెలంగాణలో SIR సర్వే: హైదరాబాద్ అంబర్‌పేట్‌లో ERO మారుతి దివాకర్ పరిశీలన

తెలంగాణ వ్యాప్తంగా SIR ప్రక్రియ కొనసాగుతోంది. ఉదయం నుంచి BLO లు ఇంటింటికి వెళ్లి ఎన్యుమరేషన్ ఫారాలు అందజేస్తున్నారు. ఓటర్లు ఆ ఫారాలు పూరించి తిరిగి ఇవ్వాలని సూచిస్తున్నారు. రాష్ట్రవ్యాప్తంగా జూలై 24 వరకు ఇంటింటి సర్వే కొనసాగనుంది.

హైదరాబాద్ అంబర్‌పేట్ నియోజకవర్గంలోని నల్లకుంట ప్రాంతంలో జరుగుతున్న సర్వేను ERO మారుతి దివాకర్ స్వయంగా పరిశీలించారు. ఎన్యుమరేషన్ ఫారానికి సంబంధించిన వివరాలు ఓటర్లకు తెలియజేస్తున్నారు.

ఈ సందర్భంగా డిప్యూటీ కమిషనర్ మారుతి దివాకర్ మాట్లాడుతూ, జూలై 25 నుంచి ఆగస్టు 24 వరకు ఎన్యుమరేషన్ ఫారాలు పంపిణీ చేస్తామని తెలిపారు. ఒక్కో ఓటర్‌కు రెండు ఫారాలు ఇస్తారని, ఒకటి ఓటరు దగ్గర ఉంచుకుని మరొకటి సంతకం చేసి అధికారులకు తిరిగి ఇవ్వాలని వివరించారు. ఫారంపై సంతకంతోపాటు ఫోన్ నంబర్ కూడా తప్పనిసరిగా ఉండాలని పేర్కొన్నారు.

ఒకే ఇంట్లో నలుగురు ఓటర్లు ఉంటే మొత్తం ఎనిమిది ఫారాలు ఇవ్వాలని తెలిపారు. SIR ప్రధాన ఉద్దేశం డూప్లికేట్ ఓట్లు, మైగ్రేషన్, మరణించిన ఓటర్ల పేర్లు ఓటర్ల జాబితా నుంచి తొలగించడమేనని మారుతి దివాకర్ స్పష్టం చేశారు. ఒక ఓటర్‌కు రెండు చోట్ల ఓట్లు ఉంటే తప్పనిసరిగా Form 7 ద్వారా ఒకటి తొలగించుకోవాలని సూచించారు.

మరో నియోజకవర్గం నుంచి హైదరాబాద్‌కు వచ్చినవారు అక్కడ ఓటు తొలగించుకుని ఇక్కడ Form 6 ద్వారా కొత్త ఓటు నమోదు చేసుకోవాలని తెలిపారు. 2002 నుంచి ఇప్పటి వరకు ఓటర్ పాత ఫోటో మారిపోయి ఉంటుందని, కాబట్టి కొత్త ఫోటో తీసుకుంటారని వివరించారు. ఓటర్లు తాము ఇచ్చిన వివరాలు సరైనవని, తమకు మరో చోట ఓటు లేదని డిక్లరేషన్ కూడా ఇవ్వాలని పేర్కొన్నారు.

ఓటర్ల జాబితాను శుద్ధి చేయడమే ఎన్నికల కమిషన్ ముఖ్య ఉద్దేశమని, అంబర్‌పేట నియోజకవర్గంలోని ప్రతి బూత్‌లో ఈ కార్యక్రమం విజయవంతంగా సాగుతోందని డిప్యూటీ కమిషనర్ తెలిపారు.