SIR తెలంగాణ: CEO సుదర్శన్ రెడ్డి ఎన్యుమరేషన్ ఫారం గురించి వివరణ

హైదరాబాద్‌లో జరిగిన ప్రెస్ మీట్‌లో తెలంగాణ CEO సుదర్శన్ రెడ్డి SIR ప్రక్రియకు సంబంధించిన ఎన్యుమరేషన్ ఫారం వివరాలు వెల్లడించారు. ప్రస్తుతం ఎలక్టోరల్ రోల్‌లో ఉన్న 3 కోట్ల 38 లక్షల మంది ఓటర్లకు ఎన్యుమరేషన్ ఫారాలు ముద్రించడం జరిగిందని ఆయన తెలిపారు. ప్రతి ఇంటిలో ఐదుగురు ఉంటే ఐదు ఫారాలు ఇవ్వడం జరుగుతుందని పేర్కొన్నారు.

ఫారంలో మూడు బాక్సులు ఉంటాయని, 2000 సంవత్సరంలో ఓటర్‌గా నమోదైన వారి వివరాలు మొదటి బాక్స్‌లో, తల్లిదండ్రులు లేదా గ్రాండ్ పేరెంట్స్ వివరాలు రెండవ బాక్స్‌లో, ప్రస్తుత వివరాలు మూడవ బాక్స్‌లో నమోదు చేయాలని వివరించారు. పూర్వపు వివరాలు తెలియని పక్షంలో పై రెండు బాక్సులు ఖాళీగా వదిలి చివరి బాక్స్ మాత్రమే నింపవచ్చని తెలిపారు.

డ్రాఫ్ట్ రోల్‌లో పేరు రాని వారు ఆగస్టు 1 నుండి Form 6 లేదా Form 8 నింపి దాఖలు చేయవచ్చని CEO పేర్కొన్నారు. ఎన్యుమరేషన్ ఫారం నింపిన వారి పేర్లు మాత్రమే డ్రాఫ్ట్ రోల్‌లోకి వస్తాయని స్పష్టం చేశారు.

హైదరాబాద్‌లో BLO లు ఇళ్ళకు రాలేదని జర్నలిస్టులు ప్రశ్నించగా, అర్బన్ ప్రాంతాల్లో అడ్రస్ గుర్తింపు సమస్య ఉందని CEO అంగీకరించారు. హైదరాబాద్‌లో 45%, మేడ్చల్‌లో 42% మ్యాపింగ్ మాత్రమే పూర్తైందని, గ్రామీణ జిల్లాల్లో 90% నుండి 99% వరకు మ్యాపింగ్ జరిగిందని తెలిపారు. అర్బన్ ప్రాంతాల్లో BLO లకు సహాయంగా మునిసిపల్ ఉద్యోగులను నియమించాలని ఆదేశాలు ఇచ్చినప్పటికీ కొన్ని చోట్ల అది అమలు కాలేదని పేర్కొన్నారు.