ఫోన్ ట్యాపింగ్ కేసు: ఆగస్టు 15 లోగా ఛార్జిషీట్ దాఖలు, ముగ్గురు నేతల పేర్లపై న్యాయ సలహా

ఫోన్ ట్యాపింగ్ కేసులో ప్రత్యేక దర్యాప్తు బృందం (SIT) ఆగస్టు 15 లోగా ఛార్జిషీట్ దాఖలు చేసేందుకు సన్నద్ధమైందని పోలీసు అధికారులు తెలిపారు. ఇప్పటి వరకు 600 మంది నుంచి వాంగ్మూలాలు సేకరించినట్లు వారు చెప్పారు.

SIT దర్యాప్తులో మాజీ ఓఎస్డీ ప్రభాకర్ రావును కీలక సూత్రధారిగా గుర్తించారు. రాజకీయ నాయకులు, వ్యాపారవేత్తలు, సినీ ప్రముఖులు, న్యాయమూర్తులు, పాత్రికేయుల ఫోన్లను ప్రభాకర్ రావు బృందం ట్యాప్ చేసినట్లు దర్యాప్తులో తేలిందని అధికారులు తెలిపారు. గత సాధారణ ఎన్నికలు, ఉప ఎన్నికల సమయంలో భారీగా ఫోన్ ట్యాపింగ్ జరిగినట్లు కూడా నిర్ధారించారు.

ఛార్జిషీట్లో ముగ్గురు రాజకీయ నేతల పేర్లు జోడించాలా వద్దా అనే విషయంపై న్యాయశాఖ సలహా తీసుకుంటున్నామని పోలీసు వర్గాలు చెప్పాయి. వారి పేర్లు చేరిస్తే చట్టపరమైన సమస్యలు రావచ్చని భావించి జాగ్రత్తగా నిర్ణయం తీసుకుంటున్నట్లు తెలిపారు. సీఎం రేవంత్ రెడ్డి వాంగ్మూలాన్ని ఛార్జిషీట్లో చేర్చాలా అనే దానిపై ఇంకా నిర్ణయం కాలేదు.

ఈ కేసులో ఇండియన్ టెలిగ్రాఫ్ చట్టం కింద కూడా కేసు నమోదు చేయనున్నారు. ఇలా టెలిగ్రాఫ్ చట్టం జోడించి ఛార్జిషీట్ దాఖలు చేయడం దేశంలో ఫోన్ ట్యాపింగ్ కేసుల్లో ఇదే తొలిసారని అధికారులు పేర్కొన్నారు. న్యాయశాఖ సలహా రాగానే ఛార్జిషీట్ పూర్తి చేస్తామని SIT బృందం స్పష్టం చేసింది.