స్నాప్‌చాట్ ప్రేమ కోసం LOC దాటిన పాకిస్తానీ యువకుడు.. ఆర్మీకి దొరకడంతో రీపాట్రియేట్

పాకిస్తాన్ ఆక్రమిత కాశ్మీర్ (PoK) కు చెందిన 22 ఏళ్ల జిషాన్ మీర్ అనే యువకుడు ఈ వారాంతంలో పాకిస్తాన్‌కు తిరిగి పంపబడ్డారు. స్నాప్‌చాట్‌లో పరిచయమైన జమ్మూ కాశ్మీర్‌కు చెందిన ఇరాం భానో అనే యువతితో ప్రేమలో పడిన ఆయన భారత్‌లోకి చట్టవిరుద్ధంగా ప్రవేశించారు.

మే 31న ఉరీ సెక్టార్ సమీపంలో లైన్ ఆఫ్ కంట్రోల్ (LOC) దాటుతూ జిషాన్‌ను భారత సైన్యం పసిగట్టి అదుపులోకి తీసుకుంది. విచారణలో ఆయన తన పూర్వీకులు జమ్మూలోని తులివారి గ్రామానికి చెందినవారని, ఇరాం భానోతో వివాహం చేసుకుని పూర్వీకుల భూమిపై హక్కు సాధించాలనే లక్ష్యంతో వచ్చినట్లు చెప్పారు. స్నాప్‌చాట్ ద్వారా మొదలైన ఈ ప్రేమ కథను అధికారులు మొదట అనుమానించారు.

జిషాన్ ప్రణాళిక ప్రకారం, అక్రమంగా దేశంలోకి ప్రవేశించిన తర్వాత స్వయంగా లొంగిపోవడం, జైలు శిక్ష అనుభవించి విడుదలైన తర్వాత భారత పౌరసత్వం పొందడం వరకు సాగింది. అయితే ఆయన వద్ద ఎలాంటి ఆయుధాలు లేకపోవడం, ఇరాం భానో కూడా ఇదే విషయాన్ని ధ్రువీకరించడంతో దర్యాప్తు సంస్థలు ఇది కేవలం ప్రేమ వ్యవహారమేనని నిర్ధారించాయి. ఎలాంటి ఉగ్రవాద కుట్ర లేదని నిరూపితమైంది.

శనివారం భారత సైన్యం చట్టపరమైన ప్రక్రియలు పూర్తి చేసి జిషాన్ మీర్‌ను పాకిస్తాన్‌కు అప్పగించింది. ఇరు దేశాల సరిహద్దు నిబంధనల కారణంగా ఆయన తిరిగి స్వదేశానికి వెళ్లాల్సి వచ్చింది.