చలో పార్లమెంట్ మార్చ్‌కు సోనం వాంగ్చుక్ పిలుపు; ఢిల్లీలో భారీ బందోబస్తు

జంతర్ మంతర్ వద్ద కాక్రోచ్ జనతా పార్టీ (CJP) ఆందోళన కొనసాగుతోంది. ఈ ఆందోళనలో భాగంగా రేపు 'చలో పార్లమెంట్ మార్చ్' నిర్వహించనున్నారు. ఈ మార్చ్‌కు పర్యావరణ కార్యకర్త సోనం వాంగ్చుక్ పిలుపునిచ్చారు.

NEET పరీక్షల రద్దు, పేపర్ లీకులు వంటి సమస్యలపై ప్రభుత్వ నిర్లక్ష్యాన్ని నిరసిస్తూ ఈ మార్చ్ నిర్వహిస్తున్నట్లు నిర్వాహకులు తెలిపారు. విద్యాశాఖ మంత్రి ధర్మేంద్ర ప్రధాన్ రాజీనామా డిమాండ్ చేస్తున్నారు. సోనం వాంగ్చుక్ తన ఎక్స్ ఖాతాలో దీనిని 'రెండవ స్వాతంత్ర్య ఉద్యమం'గా అభివర్ణించారు. ప్రజలు భయరహిత, అన్యాయరహిత భారత్ కోసం పోరాటం చేయాలని పిలుపునిచ్చారు.

ఇదే ఆందోళనలో భాగంగా అభిజిత్ దీప్కే అనే యువకుడు ఆమరణ నిరాహార దీక్ష చేపట్టారు. నిన్న పోలీసులు ఆయన దీక్షను భగ్నం చేయగా, నేడు మళ్లీ కొనసాగిస్తున్నారు. సోనం 20 రోజుల పాటు చేసిన దీక్ష తనకు స్ఫూర్తిగా ఉందని అభిజిత్ పేర్కొన్నారు. సోనం వాంగ్చుక్‌ను అక్రమంగా నిర్బంధించారని ఆయన భార్య గీతాంజలి ఆరోపించారు. ఆసుపత్రిలో వారి కదలికలపై ఆంక్షలు ఉన్నాయని, తమకు నచ్చిన ప్రైవేట్ ఆసుపత్రిలో చేరే అవకాశం లేదని ఆమె ఒక లేఖలో పేర్కొన్నారు. ఈ విషయంపై ఢిల్లీ హైకోర్టులో అత్యవసర పిటిషన్ దాఖలు చేసినట్లు తెలిపారు.

మార్చ్ నేపథ్యంలో ఢిల్లీ పోలీసులు ట్రాఫిక్ అడ్వయిజరీ జారీ చేశారు. పార్లమెంట్ సమావేశాలు ప్రారంభమవుతున్నందున పార్లమెంట్ పరిసరాల్లో 144 సెక్షన్ అమలులో ఉంటుంది. జంతర్ మంతర్ వద్ద భారీ పోలీసు బలగాలు మోహరించాయి. మార్చ్‌లో పాల్గొనే వారిని అక్కడే అడ్డుకునే అవకాశం ఉంది.

CJP తో పాటు పలు విద్యార్థి సంఘాలు కూడా ఈ మార్చ్‌లో పాల్గొననున్నాయి. NEET రద్దు తర్వాత ఆత్మహత్య చేసుకున్న వారి కుటుంబాలకు సాయం చేయాలనే డిమాండ్‌తో వీరు ఆందోళనలో చేరారు.