అమృత్ భారత్ పథకంలో తెలంగాణలో 40 రైల్వే స్టేషన్ల ఆధునీకరణ; పనుల పురోగతిపై ప్రయాణికుల అసంతృప్తి

దక్షిణ మధ్య రైల్వే తెలంగాణలో 40 రైల్వే స్టేషన్లను అమృత్ భారత్ స్టేషన్ పథకం కింద ఆధునీకరిస్తోంది. మొత్తం ₹2,750 కోట్ల అంచనా వ్యయంతో ఈ ప్రాజెక్టులు చేపడుతున్నట్లు రైల్వే అధికారులు తెలిపారు.

2024 నుంచి దేశవ్యాప్తంగా ఈ స్కీమ్ కింద పలు స్టేషన్లను ఎంపిక చేసి అభివృద్ధి పనులు ప్రారంభించారు. ఈ స్టేషన్లలో విమానాశ్రయాలను తలపించే ఆధునిక సౌకర్యాలు కల్పించాలని లక్ష్యంగా పెట్టుకున్నారు. ప్రయాణికుల కోసం లిఫ్టులు, ఎస్కలేటర్లు, 12 మీటర్ల వెడల్పైన ఫుట్ ఓవర్ బ్రిడ్జిలు, దివ్యాంగులకు అనువైన నిర్మాణాలు చేపడుతున్నట్లు అధికారులు వివరించారు.

తెలంగాణలో ఎంపిక చేసిన 40 స్టేషన్లలో కరీంనగర్, వరంగల్, బేగంపేట స్టేషన్ల అభివృద్ధి పూర్తి కాగా, మిగతా స్టేషన్లలో పనులు నెమ్మదిగా సాగుతున్నాయి. గ్రేటర్ హైదరాబాద్ పరిధిలో 13 స్టేషన్లను ఎంపిక చేయగా, ఇప్పటివరకు బేగంపేట స్టేషన్ మాత్రమే పూర్తయింది. హైటెక్ సిటీ, హఫీస్పేట్, మల్కాజగిరి, రాధాకృష్ణ నగర్ స్టేషన్లలో 90% పనులు పూర్తయ్యాయి. కాచిగూడ, లింగంపల్లి స్టేషన్ల వివరణాత్మక ప్రాజెక్టు నివేదిక (DPR) ఇంకా ఫైనల్ కాలేదు.

సికింద్రాబాద్ మెయిన్ స్టేషన్ను ₹720 కోట్లతో నిర్మిస్తున్నారు. ప్రస్తుతం 65% పనులు పూర్తయ్యాయి. ఈ స్టేషన్ 2026 చివరి నాటికి లేదా వచ్చే ఏడాది ఫిబ్రవరి వరకు అందుబాటులోకి వస్తుందని అధికారులు అంచనా వేస్తున్నారు. నాంపల్లి స్టేషన్ ₹300 కోట్ల బడ్జెట్‌తో అభివృద్ధి చేస్తుండగా, ఆరు నెలల క్రితం ప్రారంభమైన పనులు చురుకుగా సాగుతున్నాయి.

స్టేషన్ల ఆధునీకరణలో జాప్యం, సరైన అప్రోచ్ రోడ్లు, తాగునీరు, టాయిలెట్లు, రూఫింగ్ లాంటి కనీస సౌకర్యాల పనులు మందగించడంతో ప్రయాణికులు ఇబ్బందులు పడుతున్నారు. ప్రధాన స్టేషన్లతో పాటు స్థానిక స్టేషన్లు సిద్ధం కావడానికి మరింత సమయం పట్టే అవకాశం ఉందని, పనులను వేగవంతం చేయాలని ప్రయాణికులు కోరుతున్నారు.