తెలంగాణలో నైరుతి ఋతుపవనాల పూర్తి విస్తరణ; వారం రోజుల పాటు భారీ వర్షాలు

తెలంగాణలో నైరుతి ఋతుపవనాలు పూర్తి స్థాయిలో విస్తరించాయి. జూన్ 8న జోగులాంబ గద్వాల జిల్లా నుంచి ప్రవేశించిన ఈ ఋతుపవనాలు, 15 రోజుల తర్వాత రాష్ట్రమంతా కవర్ చేసినట్టు వాతావరణ శాఖ తెలిపింది.

ప్రవేశించిన తొలి 4-5 రోజుల పాటు గద్వాల ప్రాంతంలోనే నిలిచిపోయిన ఋతుపవనాలు, జూన్ 12 నాటికి హైదరాబాద్, వికారాబాద్ జిల్లాల వరకు విస్తరించాయి. అక్కడ కూడా కొంతకాలం స్థిరంగా కొనసాగాయి. సోమవారం (జూన్ 23) నాటికి మిగతా జిల్లాలన్నింటికీ విస్తరించడంతో రాష్ట్రం మొత్తం మాన్సూన్ ప్రభావంలోకి వచ్చింది.

ఈ నేపథ్యంలో, రాబోయే వారం రోజుల పాటు రాష్ట్రంలోని పలు జిల్లాల్లో మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. జూన్ 28 వరకు రాష్ట్రవ్యాప్తంగా వర్షాపాతం చురుగ్గా ఉండొచ్చు.

నేడు (జూన్ 24) జగిత్యాల, రాజన్న సిరిసిల్ల, మెదక్, కామారెడ్డి జిల్లాలకు భారీ వర్ష సూచన ఉంది. రేపు (జూన్ 25) ఆదిలాబాద్, హైదరాబాద్, రంగారెడ్డి, మేడ్చల్, మెదక్, కామారెడ్డి జిల్లాల్లో కుండపోత వర్షాలు పడే అవకాశం ఉంది. జూన్ 26న ఉమ్మడి అదిలాబాద్, వరంగల్, గ్రేటర్ హైదరాబాద్ పరిసరాల్లో వర్షం పడొచ్చు. జూన్ 27 నాటికి ఉత్తర తెలంగాణ, హైదరాబాద్, రంగారెడ్డి, వికారాబాద్, మహబూబ్ నగర్ జిల్లాల్లో భారీ వర్షాలు కురుస్తాయి.

ఋతుపవనాల పూర్తి విస్తరణతో రాబోయే వారం రోజుల పాటు ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉంది. గాలుల వేగం గంటకు 40 నుంచి 50 కిలోమీటర్ల వరకు ఉండొచ్చని హెచ్చరించారు. రాబోయే నాలుగు రోజుల్లో గరిష్ట ఉష్ణోగ్రతలు 2 నుంచి 5 డిగ్రీలు తగ్గే అవకాశం ఉంది.

హైదరాబాద్‌కు కూడా వాతావరణ శాఖ ప్రత్యేక హెచ్చరిక జారీ చేసింది. వచ్చే 48 గంటల పాటు నగరంలో ఆకాశం మేఘావృతమై మోస్తరు నుంచి భారీ వర్షాలు కురిసే అవకాశం ఉందని తెలిపింది.

ఈ హెచ్చరికల దృష్ట్యా, ప్రజలు అప్రమత్తంగా ఉండాలని అధికారులు సూచించారు.