నైరుతి రుతుపవనాలు కేరళను తాకాయి; తెలంగాణ, ఏపీలో భారీ వర్ష సూచన

నైరుతి రుతుపవనాలు కేరళ తీరాన్ని తాకాయని వాతావరణ శాఖ (IMD) ప్రకటించింది. రుతుపవనాల రాకతో రాబోయే రెండు రోజుల్లో రాయలసీమ, దక్షిణ కోస్తా ఆంధ్రప్రదేశ్‌లోని కొన్ని ప్రాంతాల్లో వర్షాలు మొదలయ్యే అవకాశం ఉందని వాతావరణ శాఖ తెలిపింది.

అయితే రుతుపవనాలు రాకముందే తెలంగాణలో విస్తారంగా వర్షాలు కురుస్తున్నాయి. జూన్ 5వ తేదీన కామారెడ్డి జిల్లా బిక్కనూర్లో ఏడు గంటల్లోనే 10.8 సెంటీమీటర్ల వర్షపాతం నమోదైంది. సదాశివనగర్లో 9.6 సెం.మీ., కామారెడ్డి టౌన్‌లో 9.3 సెం.మీ., జనగాం, కరీంనగర్, సంగారెడ్డి తదితర జిల్లాల్లో భారీ వర్షాలు పడ్డాయి.

IMD అంచనాల ప్రకారం, రాబోయే 5 రోజుల్లో తెలంగాణ, ఆంధ్రప్రదేశ్‌లో విస్తారంగా వర్షాలు కురిసే అవకాశం ఉంది. దక్షిణ తెలంగాణ, హైదరాబాద్, మహబూబ్‌నగర్ జిల్లాల్లో భారీ వర్షాలు పడనున్నాయి. ఉత్తర కర్ణాటక, మరాఠ్వాడా ప్రాంతాల్లో వర్షాలు కృష్ణా, గోదావరి బేసిన్‌లో నదీ ప్రవాహానికి దోహదపడతాయి.

ఈ ఏడాది ఎల్నినో ప్రభావం ఉండడంతో దేశంలో సగటు వర్షపాతం కొంత తగ్గొచ్చని వాతావరణ శాఖ హెచ్చరించినప్పటికీ, మొదటి 10 రోజుల వర్షపాతం మాత్రం ఆశాజనకంగా ఉంటుందని నిపుణులు చెబుతున్నారు. ఎల్నినో ఉన్నా తెలంగాణ, ఏపీలకు ఎక్కువ ఇబ్బంది ఉండకపోవచ్చని, అయితే రైతులు మారుపంటలకు సిద్ధంగా ఉండాలని సూచిస్తున్నారు. పండిన వడ్లు వెంటనే అమ్ముకోవాలని, వర్షాల వల్ల పంట దెబ్బతినకుండా జాగ్రత్తలు తీసుకోవాలని సలహా ఇచ్చారు.

వడగాలుల ప్రభావం పూర్తిగా తగ్గిపోయింది. రాబోయే రోజుల్లో ఉష్ణోగ్రతలు 40-43 డిగ్రీల సెల్సియస్ లోపే ఉండనున్నాయని, వేసవి ముగిసినట్లే భావించవచ్చునని చెబుతున్నారు.