దేశంలో నైరుతి రుతుపవనాలు ఉదృతం; పలు రాష్ట్రాల్లో భారీ వర్షాలు, IMD హెచ్చరిక

భారతదేశంలో నైరుతి రుతుపవనాలు ఉదృతంగా కొనసాగుతున్నాయి. ఇవాళ గుజరాత్, మహారాష్ట్ర, ఒడిస్సా రాష్ట్రాల్లో భారీ నుంచి అతి భారీ వర్షాలు కురిసే అవకాశం ఉందని భారత వాతావరణ శాఖ (IMD) హెచ్చరించింది.

గుజరాత్లోని పాటన్ జిల్లా సంతల్పూర్లో గత 24 గంటల్లో 390 మి.మీ. వర్షపాతం నమోదైంది. రాధన్పూర్, దీసాలోనూ భారీ వర్షాలు పడ్డాయి. ఇవే కాకుండా, ఆంధ్రప్రదేశ్, మధ్యప్రదేశ్, పశ్చిమ బెంగాల్, హిమాచల్ ప్రదేశ్, జమ్మూకశ్మీర్, ఈశాన్య రాష్ట్రాలు, కర్ణాటక, తమిళనాడు తదితర ప్రాంతాల్లో కూడా ఉరుములు, మెరుపులతో కూడిన భారీ వర్షాలు కురిసే అవకాశం ఉందని IMD తెలిపింది.

నైరుతి రాజస్థాన్పై అల్పపీడనం కొనసాగుతుండగా, వాయవ్య బంగాళాఖాతంలో మరో అల్పపీడనం ఏర్పడింది. ఈ రెండు వ్యవస్థలను కలుపుతూ మధ్య భారతంపై రుతుపవన ద్రోణి ఏర్పడి ఉంది. దీని ప్రభావంతో దేశంలోని వివిధ ప్రాంతాల్లో వర్షాలు పడుతున్నాయి.

రాబోయే 24 గంటల్లో గుజరాత్లోని సౌరాష్ట్ర, కచ్ఛ్ ప్రాంతాలతో పాటు జార్ఖండ్, ఒడిస్సా, ఛత్తీస్గఢ్ లోని పలు జిల్లాల్లో ఆకస్మిక వరదలు సంభవించే ప్రమాదముందని IMD హెచ్చరించింది. నేల ఇప్పటికే తడిసి ఉండటంతో, లోతట్టు ప్రాంతాలు జలమయమయ్యే అవకాశం ఉందని అధికారులు ప్రజలను అప్రమత్తంగా ఉండాలని సూచించారు.