మూడు రోజుల్లో తెలుగు రాష్ట్రాల్లోకి నైరుతి ఋతుపవనాలు

నైరుతి ఋతుపవనాలు మూడు రోజుల్లో తెలుగు రాష్ట్రాల్లోకి ప్రవేశించనున్నాయని విశాఖ మరియు హైదరాబాద్ వాతావరణ కేంద్రాలు తెలిపాయి. ఋతుపవనాల రాకతో వాతావరణం చల్లబడటంతో పాటు, రాగల మూడు రోజుల పాటు విస్తారంగా వర్షాలు కురిసే అవకాశం ఉందని అధికారులు వెల్లడించారు.

ఋతుపవనాలు తెలంగాణ వ్యాప్తంగా విస్తరించే ముందు రెండు రోజుల పాటు గరిష్ట ఉష్ణోగ్రతలు నమోదవుతాయని వాతావరణ శాఖ హెచ్చరించింది. ముఖ్యంగా ఉత్తర తూర్పు తెలంగాణ జిల్లాల్లో వడగాలులు తీవ్రంగా ఉంటాయని, పగటిపూట ఉష్ణోగ్రతలు సాధారణం కంటే అధికంగా ఉండే అవకాశం ఉందని పేర్కొంది.

ఋతుపవనాలు పూర్తిగా ప్రవేశించే వరకు మధ్యాహ్నం వేళల్లో ప్రజలు జాగ్రత్తగా ఉండాలని అధికారులు సూచించారు. మూడు రోజుల తర్వాత ఆంధ్రప్రదేశ్ దక్షిణ కోస్తా జిల్లాల్లో భారీ వర్షాలకు అవకాశం ఉందని విశాఖ వాతావరణ శాఖ అధికారులు తెలిపారు.