అనకాపల్లి జిల్లాలో అల్లూరి స్మారక మందిరంలో నివాళి; చరిత్రను పాఠ్యాంశాల్లో చేర్చాలని స్పీకర్ విజ్ఞప్తి

అనకాపల్లి జిల్లా గొలుగొండ మండలం కృష్ణదేవిపేటలోని అల్లూరి స్మారక మందిరంలో శాసనసభ స్పీకర్ అయ్యన్న పాత్రుడు, ఎమ్మెల్యే కొనతల రామకృష్ణతో కలిసి అల్లూరి సీతారామరాజు, గంటం దొర సమాధుల వద్ద పుష్పగుచ్ఛాలు ఉంచి నివాళులు అర్పించారు.

ఈ సందర్భంగా స్పీకర్ మాట్లాడుతూ, అల్లూరి సీతారామరాజు అనేది కేవలం వ్యక్తి కాదని, ఆయన పోరాట స్ఫూర్తి అని అభివర్ణించారు. స్వాతంత్ర పోరాట చరిత్రలో అల్లూరి సీతారామరాజు స్థానం ఎనలేనిదని పేర్కొన్నారు.

స్వాతంత్ర సమరయోధుల చరిత్రను భావితరాలకు చేర్చేలా రాష్ట్ర ప్రభుత్వం పాఠ్యాంశాలలో చేర్చాలని, స్మారక చిహ్నాలు ఏర్పాటు చేయాలని స్పీకర్ విజ్ఞప్తి చేశారు. అల్లూరికి సంబంధించిన ప్రాంతాల్లో పర్యాటక అభివృద్ధికి అవకాశం ఉందని కూడా ఆయన అభిప్రాయపడ్డారు.