మంతనిలో బొక్కలవాగు ఆధునీకరణ పనులకు మంత్రి శ్రీధర్ బాబు శంకుస్థాపన

మంతని (పెద్దపల్లి జిల్లా): మంత్రి శ్రీధర్ బాబు మంతని పట్టణంలో బొక్కలవాగు ఆధునీకరణ పనులకు శంకుస్థాపన చేశారు. కోకా-కోలా కంపెనీ సిఎస్ఆర్ నిధులతో రూ.2 కోట్ల వ్యయంతో ఈ ప్రాజెక్టు చేపడుతున్నారు.

ఈ ప్రాజెక్టులో బొక్కలవాగు డీసిల్టింగ్, నడక మార్గం, పార్క్, జిమ్ సౌకర్యాలు, గార్డెనింగ్, టేబుళ్లు వంటివి ఏర్పాటు చేస్తారు. స్థానిక ప్రజలకు ఉదయం, సాయంత్రం వాకింగ్ కోసం, పిల్లలు ఆడుకోవడానికి ఈ ప్రాంతం ఉపయోగపడుతుందని మంత్రి తెలిపారు.

ఈ సందర్భంగా మంత్రి మాట్లాడుతూ, మంతని ప్రాంతంలో స్థానిక ఉపాధి కల్పించేందుకు చర్యలు తీసుకుంటున్నామన్నారు. ఇప్పటికే టెక్స్‌టైల్ పార్కు ఏర్పాటుతో మహిళలకు ఉద్యోగాలు వస్తున్నాయన్నారు. ఇదే సమయంలో పట్టణ సుందరీకరణపై దృష్టి పెట్టామని, బొక్కలవాగు సుందరీకరణ అందులో భాగమన్నారు. కోకా-కోలా ప్రతినిధులను కోరగా వారు సిఎస్ఆర్ కింద సహకారం అందించారన్నారు.

తెలంగాణ రాష్ట్రం ఏర్పడిన తర్వాత మంతని పట్టణ అభివృద్ధికి పలు నిధులు మంజూరు చేశామని, భవిష్యత్తులో మరిన్ని పనులు చేపడతామని మంత్రి వివరించారు.