ప్రభుత్వ కార్యాలయాల్లో T-Fiber ఇంటర్నెట్ సేవలు: సెప్టెంబర్ 1 నుంచి అమలు చేయాలని మంత్రి ఆదేశం

తెలంగాణ ప్రభుత్వం రాష్ట్రంలోని అన్ని ప్రభుత్వ కార్యాలయాలకు T-Fiber నుంచి ఇంటర్నెట్ సేవలు అందించాలని నిర్ణయించింది. సచివాలయం వేదికగా ఐటీ మంత్రి శ్రీధర్ బాబు సమీక్ష సమావేశం నిర్వహించారు. ఈ సమావేశంలో ప్రభుత్వ ప్రధాన కార్యదర్శి సంజయ్ జాజు, ఐటీ శాఖ సంయుక్త కార్యదర్శి అనుదీప్ దురిశెట్టి, T-Fiber మేనేజింగ్ డైరెక్టర్ వేణు ప్రసాద్ పాల్గొన్నారు.

మంత్రి శ్రీధర్ బాబు ఈ సమావేశంలో సెప్టెంబర్ 1 నుంచి T-Fiber సేవలను రాష్ట్రవ్యాప్తంగా అమలు చేయాలని ఆదేశించారు. ప్రస్తుతం సేవలు అందిస్తున్న T-Span నెట్వర్క్ ను నెల రోజుల్లో T-Fiber కు బదిలీ చేయాలన్నారు. సెప్టెంబర్ 1 తర్వాత ప్రభుత్వ కార్యాలయాల్లో ప్రైవేట్ ఇంటర్నెట్ ఆపరేటర్లకు బిల్లులు చెల్లించవద్దని స్పష్టం చేశారు.

అదే విధంగా ప్రభుత్వం ప్రతిష్టాత్మకంగా చేపట్టిన 'ఇంటింటికి ఇంటర్నెట్' ప్రక్రియను వేగవంతం చేయాలని, ఫ్యూచర్ సిటీ ప్రాజెక్టుకు పూర్తి స్థాయి T-Fiber సేవలు అందుబాటులో ఉండేలా చర్యలు తీసుకోవాలని మంత్రి అధికారులను ఆదేశించారు.