నల్గొండలో దొంగతనం నేర్పించే శిక్షణా కేంద్రం నిర్వహించిన నిందితుడు అరెస్ట్

నల్గొండ జిల్లాలో పోలీసులు ఒక ప్రత్యేక దొంగల ముఠాను అరెస్ట్ చేశారు. ఈ ముఠా సభ్యులు తాళం వేసిన ఇళ్లను లక్ష్యంగా చేసుకుని చోరీలు చేస్తున్నారు. ముఠా నాయకుడు శ్రీకాంత్ అనే వ్యక్తి యువకులకు దొంగతనం ఎలా చేయాలో శిక్షణ ఇచ్చే కేంద్రాన్ని నిర్వహించాడు.

పోలీసుల విచారణలో శ్రీకాంత్ వ్యవహార శైలి బయటపడింది. అతను గుంటూరు, విజయవాడ, పల్నాడు జిల్లాల్లో వైన్ షాపుల దగ్గర తిరిగే యువకులతో పరిచయం పెంచుకున్నాడు. వారికి మద్యం తాగించడం, డబ్బు ఖర్చు పెట్టడం వంటి ఆఫర్లతో ఆకర్షించి, తక్కువ సమయంలో ఎక్కువ డబ్బు సంపాదించే మార్గాలను నేర్పించాడు. తాళం వేసిన ఇళ్లను ఎలా గుర్తించాలి, సీసీటీవీ కెమెరాలను ఎలా తప్పించుకోవాలి, చోరీ తర్వాత పోలీసులకు ఆనవాలివ్వకుండా ఎలా ఉండాలి వంటి విషయాల్లో కోచింగ్ ఇచ్చాడు.

ఈ శిక్షణ పొందిన యువకులు తెలంగాణ, ఆంధ్రప్రదేశ్‌లోని పలు ప్రాంతాల్లో వరుసగా 40 చోరీలు చేశారు. వీటిలో 28 కేసులు నల్గొండ జిల్లాలో నమోదు కాగా, 12 కేసులు ఆంధ్రప్రదేశ్‌లోని పల్నాడు, గుంటూరు, విజయవాడ జిల్లాల్లో నమోదయ్యాయి. సాంకేతిక ఆధారాలు, సీసీటీవీ ఫుటేజీ ఆధారంగా శ్రీకాంత్‌ను పోలీసులు అదుపులోకి తీసుకున్నారు. అతని వద్ద నుంచి 260 గ్రాముల బంగారం, 5 కిలోల వెండి, రూ. 1.5 లక్షల నగదు, ఇతర వస్తువులు స్వాధీనం చేసుకున్నారు. మొత్తం రికవరీ విలువ రూ. 53 లక్షలు.

శ్రీకాంత్‌తో పాటు మరో ఐదుగురు నిందితులను అరెస్ట్ చేశారు. పట్టుబడిన వారిలో శ్రీకాంత్ మినహా ఎవరికీ గతంలో నేర చరిత్ర లేదు. ముగ్గురు నిందితులు ఇంకా పరారీలో ఉన్నారు. పోలీసులు వారి కోసం గాలింపు చర్యలు కొనసాగిస్తున్నారు. నిందితులను కోర్టులో ప్రవేశపెట్టి రిమాండ్‌కు తరలించారు.