ముడి చమురు ధర పెరగడంతో స్టాక్ మార్కెట్లు నష్టాలు; సెన్సెక్స్ 388 పాయింట్లు తగ్గింది

అంతర్జాతీయంగా ముడి చమురు (బ్రెంట్ క్రూడ్) ధరలు భారీగా పెరగడంతో మంగళవారం దేశీయ స్టాక్ మార్కెట్లు నష్టాలతో ముగిశాయి. సెన్సెక్స్ 388 పాయింట్లు, నిఫ్టీ 50 112 పాయింట్లు పతనమయ్యాయి. బ్యాంక్ నిఫ్టీ 240 పాయింట్లు క్షీణించింది.

బ్రెంట్ క్రూడ్ ఆయిల్ ధర 89 డాలర్లకు చేరుకోవడం ఇన్వెస్టర్ల సెంటిమెంట్‌ను దెబ్బతీసింది. పశ్చిమాసియా అనిశ్చిత పరిస్థితులు, అమెరికా-ఇరాన్ వివాదం కారణంగా చమురు ధరలు పెరిగినట్లు నిపుణులు చెప్పారు.

బులియన్ మార్కెట్లో 24 క్యారెట్ల బంగారం ధర రూ.650 పెరిగింది. కిలో వెండి ధర రూ.610 తగ్గింది. బంగారం ధర పెరగడంతో టైటాన్ షేర్ లాభపడింది.

మార్కెట్ విశ్లేషకుడు జేవీ సత్యనారాయణ మాట్లాడుతూ, వీక్లీ ఎక్స్పైరీ కారణంగా కూడా మార్కెట్లు నెగెటివ్‌గా ఉన్నాయని, అయితే బుధవారం గ్యాప్ అప్‌తో ఓపెన్ అయ్యే సూచనలు ఉన్నాయని తెలిపారు. ఇన్ఫోసిస్, హెచ్‌సీఎల్ టెక్, టీసీఎస్ వంటి ఐటీ షేర్లు పాజిటివ్‌గా ముగిశాయని, మిడ్‌క్యాప్, స్మాల్‌క్యాప్ సూచీలు ఫ్లాట్‌గా ఉన్నాయని ఆయన వివరించారు.

చమురు ధరలు తగ్గితే మార్కెట్లు రికవరీ అవుతాయని, కంపెనీల త్రైమాసిక ఫలితాలు బాగుంటే షేర్ల కొనుగోలుకు అవకాశంగా భావించాలని సత్యనారాయణ సూచించారు. అమెరికా-ఇరాన్ మధ్య ఉద్రిక్తతలు, మాన్సూన్ పురోగతి వంటి అంశాలు మార్కెట్‌పై ప్రభావం చూపుతాయని ఆయన అభిప్రాయపడ్డారు.